Трамп Жанубий Корея маҳсулотларига божларни 25 фоизга оширди

АҚШ Президенти Дональд Трамп Жанубий Кореядан олиб кириладиган товарларга нисбатан бож ставкалари 15 фоиздан 25 фоизгача оширилганини маълум қилди. Бу ҳақда у ўзининг Truth Social тармоғида ёзиб қолдирди. 

Унинг айтишича, бу қарорга Жанубий Корея парламенти аввал келишилган савдо битимини ҳали ҳам тасдиқламагани сабаб бўлган.

Трампнинг сўзларига кўра, янги божлар автомобиллар, ёғоч маҳсулотлари, фармацевтика маҳсулотлари ҳамда “бошқа ўзаро тарифлар”га тааллуқли.

“Президент Ли Чжэ Мён ва мен 2025 йилнинг 30 июль куни икки давлат учун ҳам жуда яхши бўлган келишувга эришган эдик ва мен 29 октябрь куни Жанубий Кореяга ташрифим чоғида унинг шартларини яна бир бор тасдиқлаганмиз. Нега корейс қонунчилик органи ҳанузгача бу келишувни тасдиқламади? Улар тарихий савдо битимимизни қабул қилмагани сабабли, бу албатта уларнинг ҳуқуқи, мен Жанубий Корея товарларига қўйилган божларни оширишга қарор қилдим”, дея ёзган Оқ уй раҳбари. 

Қайд этиш жоиз, Трамп 2025 йил 29 октябрь куни АҚШ ва Жанубий Корея ўртасида божлар бўйича келишувга эришилганини маълум қилган эди. Шундан аввал у айнан шу келишув туфайли тарифларни 25 фоиздан 15 фоизгача пасайтирганини эълон қилган.

Кейинчалик АҚШ Президенти Сеул божларни камайтириш эвазига 350 миллиард доллар тўлашга рози бўлганини ҳам билдирган. Бундан ташқари, Жанубий Корея АҚШдан катта ҳажмда нефть ва газ сотиб олишга ҳам келишиб олган. Трампнинг таъкидлашича, Жанубий Корея компанияларнинг АҚШга киритадиган инвестициялари 600 миллиард доллардан ошади.