Трамп Украинани АҚШ сайловларига аралашишда айблади

АҚШ Президенти Дональд Трамп Украинани 2024 йилдаги АҚШ президентлик сайловларига аралашишга уринганликда айблади. Бу ҳақда у Truth Social’да ёзиб қолдирди.

Трамп АҚШ махсус хизматлари Украина ҳукумати вакилларининг ёзишмаларини қўлга киритгани ҳақидаги хабарни улашган. Бу ёзишмаларда гўёки маблағларни Жо Байденнинг қайта сайланиш кампаниясига йўналтириш режаси муҳокама қилинган.

ОАВга кўра, 2022 йилда Украина расмийлари юзлаб миллион долларни Байденнинг 2024 йилги сайлов кампаниясига йўналтириш масаласини муҳокама қилган. Айтилишича, бу маълумотлар АҚШ разведкаси томонидан олдинроқ қўлга киритилган, бироқ ўша пайтда текширилмаган. Кейинчалик бу ҳужжатлар ошкор этилган ва улар билан АҚШ Миллий разведка директори Тулси Габбард танишган.

Шу билан бирга, Трамп 2024 йил 5 ноябрь куни ўтказилган сайловларда ғалаба қозониб, АҚШ тарихида ХИХ асрдан бери тўрт йиллик танаффусдан кейин яна президентликка қайтган илк сиёсатчи бўлди.

Демократлар партиясидан дастлаб Жо Байден номзод сифатида кўрсатилиши кутилган эди, бироқ кейинчалик унинг ўрнига Камала Ҳаррис илгари сурилди ва у сайловда мағлуб бўлди.

Эслатиб ўтамиз, аввалроқ АҚШ Президенти Дональд Трамп Украина етакчиси Владимир Зеленский билан келишувга эришиш Россия Президенти Владимир Путин билан келишишга нисбатан анча қийин эканини билдирганди.