Трамп Украинага Tomahawk бериш шартини айтди

АҚШ Президенти Дональд Трамп кеча, 6 октябрь куни журналистлар билан суҳбатида Украинага узоқ масофага учадиган Tomahawk қанотли ракеталарини бериш ёки бермаслик ҳақидаги қарорни деярли қабул қилганини маълум қилди.

ОАВ вакилларидан бири Трампдан АҚШ бу ракеталарни Украинага тўғридан тўғри етказиб берадими, ёки уларни НАТОга сотиб, кейинчалик Украинага узатишга рухсат берадими, деган саволни сўради. 

“Мен деярли қарор қилдим, катта даражада. Мен улар (украиналиклар) бу ракеталарни нима учун ишлатишларини билишни хоҳлайман. Улар ракеталарни қаерга йўналтиради? Ўйлайманки, мен бу ҳақда сўрашим керак бўлади. Мен айрим саволларни берардим. Мен бу урушни кучайтириш ниятида эмасман”, дея жавоб берган Трамп.

“The Telegraph” газетасининг ёзишича, Украина Президенти Владимир Зеленский БМТ Бош Ассамблеяси доирасида Нью-Йоркда Трамп билан ёпиқ учрашувда ундан 1250–2500 км масофагача учадиган Tomahawk ракеталарини беришни сўраган. Зеленскийнинг таъкидлашича, бу ракеталар “Россия президенти Владимир Путинни тинчлик келишувини муҳокама қилиш учун музокаралар столига ўтиришга мажбур қилишга ёрдам беради”.

“The Wall Street Journal”нинг ёзишича, АҚШ Украинага Россиянинг чегарадан узоқда жойлашган энергетика инфратузилмаси объектларига узоқ масофали ракеталар билан зарба бериш учун зарур бўлган разведка маълумотларини беришга келишган. Нашрга кўра, бу қадам Трамп маъмурияти Украинага узоқ масофали қурол-яроғ бериш имкониятини кўриб чиқаётганида ташланган.

Шу билан бирга, “Reuters” агентлиги маълум қилишича, Украинага Tomahawk ракеталарини етказиб бериш эҳтимоли паст, чунки АҚШдаги мавжуд захиралар асосан АҚШ ҳарбий-денгиз кучлари ва бошқа мақсадлар учун мўлжалланган. Манбаларнинг таъкидлашича, эҳтимоли юқори вариант – камроқ масофага учадиган ракеталарни етказиб беришдир. Масалан, Украинага 2024 йилда етказиб берилган ATACMS ракеталари 300 км гача бўлган масофадаги нишонларни уриши мумкин.

Россия Президенти Владимир Путиннинг таъкидлашича, Трампнинг Украинага узоқ масофали ракеталар бериш ҳақидаги эҳтимолий қарори “Россия ва АҚШ ўртасидаги муносабатларни, ҳеч бўлмаса, улардаги ижобий тенденцияни йўқотади”.

“Мен нимани ўйласам, шуни айтаяпман. Лекин Москва ва Вашингтон муносабатлари қандай шаклланиши фақат бизга ёки менга боғлиқ эмас”, деди Путин.