Трамп учинчи муддатга сайланмоқчи эмас. Унинг вориси ким?

АҚШ Президенти Дональд Трамп учинчи президентлик муддатига номзодини қўйиш имкониятини кўриб чиқаётгани ҳақидаги маълумотни рад этди. Бу ҳақда Оқ уй раҳбари NBC News’га берган интервьюсида сўз очди.

“Мен саккиз йиллик, икки муддатли президент бўламан. Мен ҳар доим буни жуда муҳим деб ҳисоблаганман”, деган Трамп.

78 ёшли Трамп аввалроқ АҚШ президенти лавозимида учинчи ёки ҳатто тўртинчи муддат қолмоқчи экани ҳақида “ҳазиллашмаётганини” айтганди.

Бироқ, кейинчалик у ўз баёнотларининг мақсади оммавий ахборот воситаларини сохта янгиликлардан тозалаш эканлигини айтди.

Жорий йилнинг 2 май куни эса Флоридадаги қароргоҳида ёзиб олинган интервьюсида Трамп иккинчи муддат тугагандан сўнг президентлик лавозимида қолиш имкониятини кўриб чиқишни сўраган одамлардан кўплаб илтимослар бўлганини айтган.

“Қанчадан-қанча одамлар шундай қилишимни хоҳлашади. Аммо бу мен қилмоқчи бўлган иш эмас”, деган Америка раҳбари.

Трамп кейинги сайловларда АҚШ Президентлигига Республикачилар партиясидан ким даъвогарлик қилиши мумкинлиги ҳақидаги саволга “10-15 киши” борлигини айтиб, ўзининг эҳтимолий ворислари, хусусан, вице-президент Жеймс Дэвид Вэнс ёки Давлат департаменти раҳбари Марко Рубио бўлиши мумкинлигини айтган.

“Жеймс Дэвид Вэнс жуда яхши ишлайди. У ажойиб. Марко ҳам ажойиб ишлар қилмоқда”, деган Трамп.

Маълумот учун, АҚШ конституциясига кўра, Оқ уйда иккинчи президентлик муддатини ўтаётган Трамп учинчи муддатга сайланиш ҳуқуқига эга эмас. Шунингдек, конституцияга киритилган тегишли тузатишга кўра, икки йилдан ортиқ давом этган ва мандати тугамаган президентлик муддатини тўлдирган кишига ҳам икки мартадан ортиқ президент этиб сайланиш тақиқланади. Конституцияни ўзгартириш учун Сенат ва Вакиллар палатасининг учдан икки қисми, шунингдек, мамлакат штатлари ҳукуматларининг тўртдан уч қисми маъқуллаши керак.