Трамп Цзиньпин билан учрашди

Бугун, 30 октябрь куни Жанубий Кореянинг Пусан шаҳридаги Кимхэ ҳарбий авиабазасида Хитой Халқ Республикаси Раиси Си Цзиньпин ва АҚШ Президенти Дональд Трампнинг учрашуви бўлиб ўтди. Бу ҳақда Хитой марказий телевидениеси хабар берди.

Америкалик раҳбар хитойлик ҳамкасбини кутиб олиб, Пекин ва Вашингтон кўплаб масалаларда келишувга эришгани ҳамда бу йўналишда саммит давомида ҳам иш олиб борилишини таъкидлаган.

“Биз айрим масалаларни муҳокама қиламиз. Биз кўп нарсаларда келишиб олдик, айрим масалаларда эса ҳозир келишамиз”, деган Оқ уй раҳбари. 

АҚШ Президенти, шунингдек, Хитой билан савдо битими айнан шу учрашув якунида имзоланиши мумкинлигини истисно қилмаган. У ҳар доим Си Цзиньпин билан яхши муносабатларда бўлганини қайд этган. 

“Раис Си – буюк давлатнинг буюк етакчиси. Ишонаманки, биз узоқ йиллар давомида ажойиб муносабатларга эга бўламиз”, дея қўшимча қилган Трамп. 

Ўз навбатида, Си Цзиньпин Хитой ва АҚШ бир-бирига ёрдам бериб, муваффақият ва фаровонликка эришиши мумкинлигини айтган. У сўнгги йилларда доимо очиқчасига Хитой ва АҚШ шерик ва дўст бўлиши кераклигини ёқлаб келганини эслатган.

Шунингдек, Си Цзиньпин Хитойнинг ривожланиши ва тикланиши Трампнинг “Американи яна буюк давлатга айлантириш” мақсадига зид эмаслигини таъкидлаган. 

“Мен Президент Трамп билан ҳамкорликни давом эттиришга тайёрман, бу икки давлат ўртасидаги муносабатлар учун мустаҳкам пойдевор яратади ва ҳар икки мамлакат ривожи учун қулай шароитлар яратади”, деган Хитой етакчиси. 

Қайд этиш жоиз, икки давлат етакчисининг учрашуви мамлакатлар ўртасида совуқ кайфият пайдо бўлган бир даврда содир бўлмоқда. 9 октябрь куни Хитой Савдо вазирлиги 8 ноябрдан бошлаб ўрта ва оғир ноёб ер элементлари, литйий батареялар, сунъий графит анод материаллари, шунингдек, ноёб металл қазиб олиш ва қайта ишлаш ускуналари, хомашё ва юқори мустаҳкам материаллар экспортига назорат ўрнатилишини эълон қилганди.

Бунга жавобан, АҚШ Президенти Трамп 1 ноябрдан бошлаб Хитойдан импорт қилинадиган айрим товарларга 100 фоизлик бож жорий этилишини маълум қилди. У бу қарорни “Хитойнинг тажовузкор позицияси” билан изоҳлади.

Бироқ АҚШ расмийлари кейинчалик бу чора вақтинча кечиктирилиши, икки мамлакат раҳбарлари учрашиб, савдо масалаларини муҳокама қилишлари учун имкон берилишини билдирди.

Маълумот учун, икки давлат етакчиси Осиё-Тинч океани иқтисодий ҳамкорлиги (APEC) саммитида иштирок этмоқда. APEC 1989 йилда ташкил этилган бўлиб, 21 та мамлакат иқтисодиётини бирлаштиради. У халқаро ташкилот мақомига эга бўлмаса-да, минтақада савдо ҳамкорлигини ривожлантириш учун муҳим майдон ҳисобланади. 2025 йилда саммитга раислик қилиш ҳуқуқи Жанубий Кореяга ўтган.

Эслатиб ўтамиз, аввалроқ Дональд Трамп Шимолий Корея етакчиси Ким Чен Ин билан Осиёга уюштираётган ташрифи чоғида учрашув ташкил эта олмаганини айтганди. У, шунингдек, Шимолий ва Жанубий Корея ўртасидаги муносабатлардаги “тангликни юмшатиш” ниятида эканини қўшимча қилган.