Трамп Транспорт вазирини NASA раҳбарлигига тайинлади

АҚШ Президенти Дональд Трамп Транспорт вазири Шон Даффини вақтинча АҚШ Миллий аэронавтика ва космик тадқиқотлар бошқармаси (NASA) раҳбари этиб тайинлади. Бу ҳақда у ўзининг Truth Social’даги саҳифасида маълум қилди.

“Шон мамлакатимиз транспорти масалалари, жумладан, замонавий ҳаво ҳаракатини бошқариш тизимларини яратиш, йўллар ва кўприкларни тиклаб, уларни яна самарали ва чиройли қилиш бўйича улкан ишларни бажармоқда. У тобора муҳим аҳамият касб этаётган космик агентлик учун ҳатто қисқа муддатга бўлса ҳам ажойиб раҳбар бўлади”, деб ёзди Трамп.

Қайд этиш жоиз, 2024 йил декабрь ойида Трамп NASA раҳбарлигига миллиардер-астронавт Жаред Айзекманни номзод сифатида кўрсатган эди. Ўшанда у Жареднинг “коинотга бўлган иштиёқи, астронавтлик тажрибаси ва тадқиқотлар доирасини кенгайтиришга интилиши” уни идеал номзодга айлантиришини айтганди. “Reuters”нинг ёзишича, Айзекманнинг номзоди Трампга миллиардер Илон Маскнинг таъсири остида илгари сурилган. Чунки Айзекман Маскнинг яқин ҳамкори сифатида кўрилади.

Апрель ойида Айзекманнинг номзоди тасдиқланган, бироқ июнь бошида Трамп бу номзодни қайтариб олган ва яқин орада янги номзодни эълон қилишини билдирган. Бу қарор Трамп ва Маск ўртасидаги кескинлашган можаро фонида қабул қилинган. Айзекманнинг айтишича, номзодни қайтариб олишга Трамп маслаҳатчиларининг босими ҳам сабаб бўлган, айниқса Маск билан муносабатлар ёмонлашганидан кейин.

Эслатиб ўтамиз, Маск ва Трамп ўртасидаги очиқ можаролар Трампнинг бюджет тақчиллигини оширувчи “катта ажойиб” солиқ имтиёзлари қонун лойиҳасини Маск танқид қилганидан кейин бошланганди. Трамп эса Маскдан кўнгли қолганини билдирган. Жорий йилнинг июль ойи бошида Маск янги сиёсий лойиҳа – “Америка” партиясини ишга тушираётганини эълон қилди. У партиянинг асосий мақсади Конгрессга кириб бориш ва баҳсли қонунлар бўйича ҳал қилувчи овозларни таъминлаш бўлишини айтди.