Трамп Си Цзиньпин билан “жуда самарали” суҳбат ўтказганини айтди

Бугун, 19 сентябрь куни АҚШ Президенти Дональд Трамп Хитой Халқ Республикаси Раиси Си Цзиньпин билан жуда самарали музокара ўтказганини маълум қилди ва улар кўплаб масалаларда сезиларли ютуқларга эришганини билдирди. Бу ҳақда у ўзининг Truth Social’даги саҳифасида ёзди.

“Мен ҳозиргина ХХР Раиси Си Цзиньпин билан жуда самарали телефон орқали суҳбатни якунладим. Биз кўплаб муҳим масалаларда, жумладан савдо, фентанил, Россия-Украина можаросини тўхтатиш зарурати ва TikTok бўйича келишувни тасдиқлаш борасида тараққиётга эришдик”, деб ёзди АҚШ етакчиси. 

Трамп, шунингдек, Жанубий Кореяда бўлиб ўтадиган Осиё-Тинч океани иқтисодий ҳамкорлиги (APEC) саммитида Хитой раҳбари билан учрашишга келишилганини айтди. Уларнинг мулоқотида Трампнинг 2026 йил бошида Хитойга қилинадиган ташрифи ҳам муҳокама қилинган, Си Цзиньпин эса ўзига қулай вақтда АҚШга жавоб ташрифи билан боришга ваъда берган.

“Бу жуда фойдали суҳбат бўлди, биз яна телефон орқали гаплашамиз. TikTok бўйича қўллаб-қувватлагани учун миннатдорман ва иккимиз ҳам APEC’даги учрашувни интиқлик билан кутяпмиз”, дейди АҚШ Президенти.

Суҳбатнинг бошқа тафсилотлари ҳозирча маълум эмас. 

Эслатиб ўтамиз, аввалроқ Дональд Трамп Си Цзиньпин билан телефон орқали мулоқот қилиши ҳақида хабар берилган эди. Суҳбатнинг асосий мавзулари сифатида тарифлар ва TikTok’нинг АҚШдаги тақдири бўлиши маълум эди.

Олдинроқ эса АҚШ Молия вазири Скотт Бессент Хитой АҚШ билан TikTok ижтимоий тармоғини сотиш шартлари бўйича келишувга эришганини айтганди. Бессент тафсилотларни ошкор қилишдан бош тортиб, барча маълумотлар Дональд Трамп ва Си Цзиньпин мулоқотида эълон қилинишини билдирган.