Трамп Путинни зудлик билан ўт очишни тўхтатишга чақирди

АҚШнинг сайланган президенти Дональд Трамп Украинада зудлик билан ўт очишни тўхтатишни талаб қилди ҳамда Москва ва Киевни музокараларни бошлашга чақирди. Бу ҳақда бугун, 8 декабрь куни у Truth Social саҳифасида ёзди.

Бир кун аввал Парижда Зеленский билан учрашган Трамп Украина Президенти Владимир Зеленский урушни тугатиш, “жинниликка барҳам бериш” учун Россия билан келишувга интилаётганини айтди. Учрашувда Франция Президенти Эммануэль Макрон ҳам иштирок этганди.

“Асад кетди. У ўз мамлакатидан қочиб кетган. Унинг ҳимоячиси Владимир Путин бошчилигидаги Россия энди уни ҳимоя қилишдан манфаатдор эмас. Россия у ерда бўлишига умуман ҳеч қандай сабаб қолмади. Улар ҳеч қачон бошланмаслиги керак бўлган ва абадий давом этиши мумкин бўлмаган, 600 мингга яқин россиялик аскар ҳалок бўлган ёки яраланган Украинадаги уруш туфайли Сурияга бўлган қизиқишларини бутунлай йўқотди”, дея ёзган Трамп.

Трамп дарҳол ўт очишни тўхтатиш ва музокаралар бошланиши кераклигини ҳам ёзиб қолдирган.

“Жуда кўп ҳаёт беҳуда кетмоқда, жуда кўп оилалар вайрон қилинмоқда ва агар бу давом этса, у янада каттароқ ва ундан ҳам ёмонроқ нарсага айланиши мумкин. Мен Владимирни яхши биламан. Бу унинг ҳаракат қилиш вақти. Хитой ёрдам бериши мумкин. Дунё кутмоқда!”, дея сўзларини якунлаган сайланган президент.

Зеленский аввалроқ Теlegram'да Трамп ва Макронга “самарали учрашув” учун миннатдорчилик билдириб, “Президент Трамп ҳар доимгидек қатъиятли” ва улар “ишни давом эттиришга келишиб олганини” таъкидлаган.

“Биз халқимиз, жанг майдонидаги вазият ва Украина учун адолатли дунё ҳақида гаплашдик, ҳаммамиз бу урушни имкон қадар тезроқ ва адолатли тугатишни хоҳлаймиз”, деб ёзган Зеленский.

Эслатиб ўтамиз, аввалроқ Парижда Украина Президенти Владимир Зеленский ва Франция етакчиси Эммануэль Макрон ҳамда АҚШнинг сайланган президенти Дональд Трамп ўртасидаги учрашув бўлиб ўтганди. Макрон, Трамп ва Зеленский ўртасидаги учрашув якуний баёнотсиз бошланганидан 20 дақиқа ўтиб якунига етди. Маълумотларга кўра, учрашув бўйича келишув деярли у бошланишидан олдин тузилган. Украина Президентининг спикери Сергей Никифоровнинг айтишича, сиёсатчилар 35 дақиқа суҳбатлашган. Суҳбат тафсилотлари ошкор этилмаган.