Трамп нега аввал Путинга қўнғироқ қилганини айтди

АҚШ Президенти Дональд Трамп дастлаб Россия Президенти Владимир Путинга қўнғироқ қилиб, сўнг Украина раҳбари Владимир Зеленский билан мулоқот қилгани тўғри қарор бўлганини айтди. Бу ҳақда у кеча, 13 февраль куни Оқ уйда журналистлар билан суҳбатда маълум қилди.

“Кимдир аввал Зеленскийга қўнғироқ қилишим кераклигини айтди. Мен бундай деб ҳисобламайман. Мен Россия келишувга тайёрми ёки йўқлигини аниқлашим керак эди. Зеленскийнинг бунга тайёр эканини биламан. Энди эса Россия ҳам шундай эканини биламан”, дея тушунтирди у.

Эслатиб ўтамиз, 12 февраль куни Путин ва Трамп телефон орқали суҳбатлашганди. Улар Украинадаги жанговар ҳаракатларни тўхтатиш, икки томонлама муносабатлар ва бошқа масалаларни муҳокама қилган. Шунингдек, келгусида мулоқотни давом эттириш ва шахсий учрашув ташкил этишга келишиб олган. Кейинчалик, Трамп Зеленский билан ҳам телефон орқали суҳбат ўтказган.

Путин билан телефон орқали суҳбатдан сўнг Америка етакчиси улар Украина бўйича музокараларни дарҳол бошлашга келишиб олганини маълум қилди. Президентлар, шунингдек, шахсан учрашишга келишиб, бир-бирларини ўз мамлакатларига таклиф қилган.

Кремль баёнотига кўра, Америка Президенти жанговар ҳаракатларни имкон қадар тезроқ тинч йўл билан тўхтатиш тарафдори эканини билдирган. Путин эса “узоқ муддатли келишувга фақат тинч музокаралар йўли билан эришиш мумкин”, деган фикрга қўшилган.

Кейинчалик Украина Президенти қўнғироқлар кетма-кетлигини “ёқимсиз” деб баҳолаган. Зеленскийнинг фикрича, Киев учун устувор йўналиш – Украина ва АҚШ томонларининг учрашуви бўлиб қолмоқда. Унинг айтишича, бундай музокаралар ва жанговар ҳаракатларни тўхтатиш бўйича режа ишлаб чиқилгач россияликлар билан гаплашиш адолатли бўларди.