Трамп Маскка “дўконини ёпиб”, Африкага қайтишни таклиф қилди

АҚШ Президенти Дональд Трамп SpaceX ва Tesla асосчиси Илон Маск бизнесларини ёпиб, Жанубий Африкага қайтиши кераклигини айтди. Бу ҳақда ўзиниг Truth Social тармоғида маълум қилди.

Трампга кўра, бизнесмен Вашингтонни тарк этса, бюджетдан катта пул тежалади.

“Илон, эҳтимол тарихдаги ҳар қандай одамдан кўра кўпроқ субсидия олади ва субсидияларсиз у дўконини ёпиб, уйига, Жанубий Африкага қайтиши керак эди. Энди ракеталар, сунъий йўлдошлар ёки электромобиль ишлаб чиқариш бўлмайди ва мамлакатимиз жуда кўп пулни тежайди”, дейди АҚШ раҳбари.

Маълумот учун, Маск – дунёдаги энг бой одам. “Bloomberg” унинг бойлигини 363 миллиард доллар деб баҳолаган. Маск Трампнинг президентлик кампаниясининг асосий ҳомийларидан бири эди. У Жанубий Африкада туғилиб ўсган ва 17 ёшида аввал Канадага, сўнгра ўқиш учун АҚШга борган ва у ерда кейинчалик бизнес билан шуғулланган. У Жанубий Африка ҳукуматини бир неча бор танқид қилган ва уни “оқ геноцид”да айблаган.

Эслатиб ўтамиз, олдинроқ Илон Маск жамоатчилик орасида шов-шувга сабаб бўлган АҚШ Президенти Дональд Трамп ҳақидаги сўзлари учун Х ижтимоий тармоғида узр сўраганди. Кейинчалик эса у Россия Ташқи ишлар вазирлигидан сиёсий бошпана сўрагани хабар қилинди.

Дилшод Ҳакимов