Трамп маъмурияти хорижлик талабалар амалиётини ҳам чекламоқчи

Дональд Трамп маъмурияти АҚШ университетларида таҳсил олаётган хорижлик талабалар учун айрим амалиётларга рухсат беришни чеклашни режалаштирмоқда. Бу ҳақда 24 августда университетларга юборилган федерал меморандумда маълум қилинган.

Меморандумда АҚШ Иммиграция ва Божхона назорати хизмати таркибидаги Талабалар ва алмашинув дастури хорижлик талабаларга ўқув амалиёти учун бериладиган рухсатномаларда қоидалар бузилиши кўпайганини қайд этган.

Ҳужжатга кўра, Curriculum Practical Training (CPT) фақат талабанинг мавжуд ўқув дастурининг ажралмас қисми бўлган ҳолатларда берилиши керак. Қоидаларга риоя қилмаган таълим муассасаси хорижлик талабаларни қабул қилиш ҳуқуқидан маҳрум бўлиши мумкин.

Меморандумдан сўнг айрим университетлар, жумладан Калифорния университетининг Лос-Анжелес ва Беркли кампуслари хорижлик талабалар учун айрим ишлаш рухсатномаларини расмийлаштиришни вақтинча тўхтатган.

UCLA вакили университет федерал кўрсатмаларни кўриб чиқиш ва кейинги чораларни белгилаш даврида айрим CPT рухсатномаларини беришни тўхтатганини билдирган.

UC Berkeley халқаро офиси эса 24 августдаги меморандум аввалги ҳужжатга қараганда аниқроқ ва чекловларни кучайтирувчи мазмунга эга эканини маълум қилган. Университет айрим ишлаш рухсатномаларини беришдаги танаффусни “келажакдаги ноаниқ муддатга” узайтирган, бироқ диплом талабларига мос CPT аризаларини одатдагидек кўриб чиқишини айтган.

Офис янги федерал талабларга мос жараёнларни ишлаб чиқиш учун ҳуқуқшунослар билан маслаҳатлашишини билдирган.

АҚШ Миллий хавфсизлик департаменти эса қоидалар ўзгармаганини таъкидлаган.

“Бироқ университетлар ва иш берувчилар огоҳлантирилган деб ҳисобланиши керак: Президент Трамп даврида ушбу сахий тизимдан суиистеъмол қилишга энди йўл қўйилмайди”, дейилади вазирлик баёнотида.

Трамп маъмурияти сўнгги вақтларда университетларга нисбатан текширувлар ва молиявий ёрдамни чеклаш билан боғлиқ чораларни кучайтирди. Бунга Фаластин тарафдори бўлган намойишлар, хилма-хиллик дастурлари, иқлим лойиҳалари ва трансгендерлар сиёсати каби масалалар сабаб бўлмоқда.

Ҳуқуқ ҳимоячилари бу чоралар сўз эркинлиги, академик эркинлик ва қонуний жараёнларга оид хавотирларни кучайтириши мумкинлигини билдирган.

Алоҳида ҳолатда, АҚШ Адлия вазирлиги Жорж Вашингтон университети тиббиёт мактабига қабул жараёнида қора танли ва испан тилли номзодларга устунлик берилганини даъво қилди. Университет эса вазирлик хулосалари нотўғри эканини ва қабул сиёсати қонунларга мувофиқ бўлганини билдирди.

Трамп маъмурияти, шунингдек, Фаластин тарафдори бўлган намойишларда қатнашган айрим талабаларнинг визаларини ҳам бекор қилган. Намойишчилар, жумладан айрим яҳудий гуруҳлар, Исроилнинг Ғазодаги амалиётлари ва Фаластин ҳудудларини эгаллашига қарши чиқиш антисемитизм эмаслигини таъкидламоқда.