Трамп хориж киносига ҳам бож жорий қилди

north_east

Трамп божхона тўловларини жорий этишни тўхтатди

АҚШ Президенти Дональд Трамп хорижий кинофильмлар импортига 100 фоизлик божхона тўловлари жорий этилишини эълон қилди. Бу ҳақда у ўзининг Truth Social ижтимоий тармоғидаги саҳифасида маълум қилди. 

Трамп чет эл киноларини “миллий хавфсизликка таҳдид” деб атаган ва бу чора Америка кино саноатини ҳимоя қилиш мақсадида кўрилаётганини билдирган.

“Америка кино саноати жадаллик билан йўқ бўлиб кетмоқда. Бошқа мамлакатлар бизнинг режиссёрларимиз ва студияларимизни имтиёзлар билан ўзига жалб қилмоқда. Голливуд ва АҚШнинг бошқа йўналишлари банкрот бўлади. Бу хавфсизлик учун хавф туғдирадиган ва пропагандани тарқатадиган режалаштирилган ҳужум”, деб ёзди Трамп.

У Савдо вазирлиги ҳамда АҚШ савдо вакилига хорижий фильмлар учун божларни жорий этиш жараёни бўйича кўрсатма берганини маълум қилган.

“Биз бошқаларнинг ҳикоялари бизнинг қадриятларимизга путур етказишига йўл қўймаймиз”, дея қўшимча қилган АҚШ Президенти.

Трампнинг тарифлари

Жорий йилнинг 2 апрель куни Трамп 185 давлатга нисбатан божлар жорий этилишини маълум қилганди. Тарифлар 10 фоиздан 50 фоизгача бўлган. АҚШ бож жорий қилган давлатлар рўйхатига Ўзбекистон ҳам киритилган.

9 апрель куни Трамп тахминан 60 та давлатдан импорт қилинадиган маҳсулотларга нисбатан божларни 90 кунга кечиктиришини билдирган. Шунингдек, Хитойдан ташқари барча давлатларга 10 фоизлик ֧“базавий” бож ва илгари жорий этилган 25 фоизлик автомобиль, пўлат ва алюминий учун тарифлар амал қилади. Хитойдан импорт қилинадиган маҳсулотларга нисбатан бож 145 фоиз этиб белгиланган.

Эслатиб ўтамиз, аввалроқ АҚШ Сенати Россиядан нефть, газ, уран ва бошқа табиий ресурсларни сотиб олаётган давлатлар учун 500 фоизлик импорт божлари жорий этилишини назарда тутувчи қонун лойиҳасини маъқуллаганди.