Трамп илк бор Венесуэланинг янги етакчиси билан гаплашди

Кеча, 14 январь куни Венесуэланинг муваққат етакчиси Делси Родригес АҚШ Президенти Дональд Трамп билан телефон орқали мулоқот қилди. Бу ҳақда Родригес ўзининг Telegram-каналида ёзди.

“Бугун Америка Қўшма Штатлари Президенти Дональд Трамп билан узоқ, самарали ва дўстона руҳда телефон  орқали суҳбатлашдим. Суҳбат ўзаро ҳурмат муҳитида бўлиб ўтди, унда халқларимиз манфаатлари йўлида икки томонлама ҳамкорлик кун тартиби ҳамда ҳукуматларимиз ўртасидаги ҳал этилмаган масалалар муҳокама қилинди”, деган Родригес. 

Трамп ҳам Венесуэла президенти вазифасини бажарувчи шахс билан телефон орқали гаплашганини маълум қилиб, бу Родригес тайинланганидан буён улар ўртасидаги илк суҳбат бўлганини таъкидлаган. АҚШ Президенти уни “ажойиб инсон” деб атаган.

“Биз телефон орқали узоқ суҳбатлашдик, кўплаб масалаларни муҳокама қилдик ва менимча, Венесуэла билан жуда яқин ҳамкорликни йўлга қўймоқдамиз”, деган Оқ уй раҳбари.

Кейинроқ Трамп ўзининг Truth Social ижтимоий тармоғида Родригес билан “жуда яхши телефон суҳбати” бўлиб ўтганини ҳам ёзган.

“Биз Венесуэлага барқарорлашиш ва тикланишда ёрдам беряпмиз. Кўплаб мавзулар, жумладан нефть, фойдали қазилмалар, савдо ва албатта миллий хавфсизлик масалалари муҳокама қилинди. Америка Қўшма Штатлари ва Венесуэла ўртасидаги бу ҳамкорлик ҳамма учун самарали бўлади. Тез орада Венесуэла яна буюк ва гуллаб-яшнаган давлатга айланади, ҳатто аввалгидан ҳам яхшироқ бўлиши мумкин!” дея таъкидлаган Америка етакчиси. 

Маълумот учун, 3 январь куни АҚШ Венесуэлада махсус операция ўтказиб, мамлакат етакчиси Николас Мадуро ва унинг рафиқасини қўлга олиб, АҚШга олиб кетган эди. 4 январь куни Мадурога яқин сиёсатчи бўлган Родригес мамлакатнинг вақтинчалик раҳбари этиб тайинланди. 

Эслатиб ўтамиз, 13 январь куни Миллий Ассамблеяси президенти Хорхе Родригес Венесуэла қамоқхоналарида Николас Мадуро сиёсати доирасида ҳибсга олинган 400 дан ортиқ маҳбус озод қилингани ҳақида хабар берилганди.