Трамп Эронга ядро қуролисиз бахтли бўлишни тилади

Америка Қўшма Штатлари Президенти Дональд Трамп яна бир бор Эроннинг гуллаб-яшнаши, аммо ядро қуролидан холи давлат бўлишини тилади. Бу ҳақда Президент Оқ уйда журналистлар билан бўлиб ўтган учрашувда сўз очди.

“Мен Эрон сеҳрли, буюк, бахтли мамлакат бўлишини истайман. Аммо улар ядро қуролига эга бўлмаслиги керак”, деган АҚШ раҳбари.

Маълум қилинишича, Трампнинг ушбу баёнотлари 12 апрель куни бўлиб ўтадиган ядровий келишув бўйича Америка-Эрон музокаралари фонида янграмоқда.

Шу билан бирга, Эрон парламенти президиуми аъзоси Аҳмад Нодирий Теҳроннинг Ядро қуролини тарқатмаслик тўғрисидаги шартномага аъзолигини давом эттиришни қайта кўриб чиқиш кераклигини ҳам айтган.

Маълумот учун, бугун, 12 апрель куни Уммонда АҚШ ва Эрон вакилларининг учрашуви бўлиб ўтади. Унда Эрон ядро дастури атрофидаги вазиятни тартибга солиш параметрларини муҳокама қилиш режалаштирилган. Оқ уйнинг таъкидлашича, музокаралар бевосита, Теҳроннинг таъкидлашича, воситачилар орқали олиб борилади. Америка делегациясига Президентнинг махсус вакили Стив Уиткофф, Эрон делегациясига эса Ташқи ишлар вазири Аббос Ароқчи бошчилик қилади.

Теҳрон келажакда келишувдан чиқишга қарор қилиши мумкин бўлган томонга қарши санкциялар жорий этиш имкониятини ҳужжатда белгилашни таклиф қилиб, Қўшма кенг қамровли ҳаракатлар режасини такомиллаштиришни талаб қилмоқда. АҚШ, ўз навбатида, нафақат Эрон ядро дастурининг ҳарбий қисми ривожланишига йўл қўймасликни, балки Эроннинг барча ядровий объектларини тўлиқ йўқ қилишни талаб қилмоқда. Бундан ташқари, Вашингтон Теҳроннинг Яқин Шарқдаги иттифоқчиларини қўллаб-қувватлашни тўхтатиши ва Эроннинг баллистик ракеталарни ишлаб чиқиш дастурини чеклашни талаб қилмоқда.

Эрон ўзининг ташқи сиёсий ва мудофаа имкониятларини чеклашга қаратилган ҳар қандай уринишларни қатъиян рад этиб, тинч ядро энергетикасини ривожлантиришга бўлган ҳуқуқини таъкидлаб келади.

Эслатиб ўтамиз, АҚШ ва Эрон расмийларининг ядровий келишувга қайтиш бўйича режалаштирилган учрашувидан бир неча кун олдин АҚШ Президенти Дональд Трамп Теҳрон унинг ультиматумини қабул қилмаса, ҳарбий ҳаракатлар бошлаш ниятида эканини таъкидлаганди.