Трамп Эрон ядровий иншоотларини “йўқ қилиш” билан яна таҳдид қилди

АҚШ Президенти Дональд Трамп, агар Теҳрон уларни қайта ишга туширишга уринса, Эроннинг ядровий иншоотларига яна зарба беришга ваъда берди. Бу ҳақда у кеча, 28 июль куни Шотландияда Британия Бош вазири Кир Стармер билан учрашуви чоғида матбуотга берган интервюсида сўз очди.

“Биз уларнинг (Эроннинг) ядровий имкониятларини йўқ қилдик. Улар яна бошлашлари мумкин. Агар шундай қилса, биз уларни (ядровий иншоотларни) бир деганда йўқ қиламиз”, деди Трамп 

21 июль куни Эрон Ташқи ишлар вазири Аббос Арагчи “Fox News” телеканалига берган интервьюсида АҚШ ядровий иншоотларига зарба берганига қарамай, Теҳрон уран бойитишдан воз кечмаслигини айтганди. ТИВ раҳбарининг сўзларига кўра, “зарар жиддий ва оғир” бўлгани учун у тўхтатилган.

“Аммо биз бойитишдан воз кечолмаслигимиз аниқ, чунки бу бизнинг олимларимизнинг ютуғидир”, деган Ароқчи бу “миллий ғурур масаласи” эканини қўшимча қилиб.

Шунингдек, у ҳар қандай келажакдаги ядровий келишув Эронга бу жараёнга ҳуқуқ бериши кераклигини маълум қилди.

“Агар тажовуз такрорланса, биз қатъийроқ ва яшириб бўлмайдиган тарзда жавоб беришдан тортинмаймиз. Ҳамма билиши керакки, биз эронликлар тинч ядровий дастуримизни сотиб олмаганмиз; биз уни қон, тер ва кўз ёшлар билан қурдик. Бизнинг қудратли инсон ресурсларимиз томонидан ишлаб чиқилган технология ва ноу-хауни бомбардимон қилиш йўли билан йўқ қилиб бўлмайди”, деб ёзди Ароқчи кеча, 28 июль куни X'даги саҳифасида. 

Эслатиб ўтамиз, 22 июнга ўтар кечаси АҚШ ҳарбийлари Эрон ядровий дастурининг учта жойига – Фордо, Натанз ва Исфахонга ҳаводан зарбалар берганди. Дональд Трамп халққа қилган мурожаатида Теҳрондаги уранни бойитиш бўйича асосий иншоотлар йўқ қилинганини айтди. Кейин Эрон расмийлари ҳужум фактини тасдиқлади, аммо бу тузатиб бўлмайдиган зарар келтирмаганини таъкидлади.