Трамп Алиевнинг нутқини тармоқларда бўлишди

АҚШ Президент Дональд Трамп бугун, 22 июль Озарбайжон раҳбари Илҳом Алиевнинг Хонкендида бўлиб ўтган учинчи Шуша халқаро медиа-форумидаги ўзи ҳақида айтилган фикрлари акс этган видеони Truth Social тармоғида эълон қилди.

Унда Илҳом Алиев Дональд Трампнинг президентликка сайлангани Озарбайжон учун қандай манфаатлар келтириши ҳамда Трамп қандай характердаги раҳбар эканини айтиб ўтган.

“Мен Трампнинг ғалабасини олдиндан башорат қилмадим. Шунчаки Озарбайжон халқи учун афзалроқ бўлишини тиладим. Трамп ҳам биз каби асосий қадриятларни, шу жумладан оилавий қадриятларни эъзозлайдиган Президент”, дейди Алиев.

 Шунингдек, Илҳом Алиев Озарбайжон ва Арманистон ўртасидаги можаронинг якунланишида Трампнинг ролини эътироф этиб, унга миннатдорлик билдирган ҳамда уни АҚШ тарихидаги уруш бошламаган ягона Президент деб атаган.

“У АҚШ президентларидан уруш бошламаган ягона одам. Ва унинг ҳокимиятдаги қисқа муддати давомида у урушларни тугатаётган одам эканини кўриш мумкин. Шунингдек, биз Озарбайжон ва Арманистонга ёрдам бергани, натижада келишувга эришилгани учун ундан жуда миннатдормиз”, дейди Озарбайжон раҳбари.

Нутқида Алиев Президент Трампга барча ишларини охирига етказишида тилакдош эканини билдирган ҳамда Вашингтон “ботқоғи” масаласида ҳам қўлдан келганча ёрдам беришини таъкидлаган.

“Халқаро хавфсизликнинг глобал масалалари билан банд бўлишига қарамай, у Жанубий Кавказдаги вазиятни ҳам ўз кўз ўнгида ушлаб туради. Биз Озарбайжонда, албатта, у кўп сабабларга кўра ғалаба қозонганидан хурсандмиз ва табиийки, биз унга ишни охиригача етказишини тилаймиз, айниқса Вашингтон ботқоғига келсак, уни охиригача қуритамиз”, дейди Илҳом Алиев.

Эслатиб ўтамиз, Озарбайжон Президенти Илҳом Алиев 19 июль куни Хонкендида бўлиб ўтган учинчи Шуша халқаро медиа-форумида қанташганди. Украиналик журналист Дмитрий Гордоннинг саволига жавоб берар экан, Президент Алиев 3 йилдан бери Россия босқинига қарши курашаётган мамлакат ва унинг аҳолисига ҳеч қачон таслим бўлмасликни маслаҳат бердганди.

Дилшод Ҳакимов