Трамп 2 та жаҳон урушида АҚШнинг “қиёслаб бўлмайдиган” ҳиссаси борлигини айтди

АҚШ Президенти Дональд Трамп Биринчи ва Иккинчи жаҳон урушларида Қўшма Штатларнинг ғалабага қўшган “қиёслаб бўлмайдиган” катта ҳиссаси борлигини айтди ва уларнинг ҳар бири учун янги байрамлар – Ғалаба кунларини эълон қилди. Бу ҳақда у Truth Social ижтимоий тармоғида ёзган.

Республикачи америкаликларни ғалаба кунларини нишонлашни бошлашга чақирди. Ғалаба кунлари икки уруш учун мос равишда 11 ноябрь ва 8 майда нишонланади.

“Биз иккала урушда ҳам ғалаба қозондик, куч, жасорат ва ҳарбий маҳоратда ҳеч ким бизга яқинлашмади, лекин биз энди ҳеч нарсани нишонламаймиз, чунки бизда буни қандай қилишни биладиган раҳбарлар йўқ!” деб ёзган Трамп.

Россия Президенти Владимир Путин СССРни “Европа халқларининг асосий озод қилувчиси” деб атади. Унинг сўзларига кўра, нацизмга қарши курашга айнан совет аскарлари ҳал қилувчи ҳисса қўшган.

Маълумот учун, 1941 йил 11 мартда АҚШ Конгресси ижарага бериш тўғрисидаги қонунни қабул қилди. Кейин СССРга автомобиллар, самолётлар, ўқ-дорилар ва танклар кела бошлади. Америкалик тарихчи Альберт Уикс АҚШ дастурини “Россиянинг қутқарувчиси” деб атади ва хусусан, СССРда уруш давридаги темирйўл техникасининг 90 фоиздан ортиғи ленд-лизинг ёрдамида ишлаб чиқарилганини таъкидлади.

Россия Президентининг матбуот котиби Дмитрий Песков бу баёнотга қўшилмади ва совет армияси АҚШдан ленд-лизингсиз ҳам ўшанда фашистлар Германиясини мағлуб эта олишини таъкидлади.

Германиянинг сўзсиз таслим бўлиши тўғрисидаги шартномани имзолаш 8 май куни Берлинда маҳаллий вақт билан соат 22:43 да якунига етди. Москвада бу вақтда икки соат олдинда эди ва янги кун аллақачон бошланган эди – 9 май.

Ўшандан бери Ғарбий Европа ва АҚШда фашизм устидан қозонилган Ғалаба куни 8 майда, собиқ СССР ва Шарқий Европа мамлакатларида эса 9 майда нишонланади. Россияда 9 май давлат байрами ҳисобланади.

Иккинчи жаҳон уруши кейинчалик Япониянинг таслим бўлиш тўғрисидаги ҳужжат имзолангандан сўнг тугади. Бу 1945 йил 2 сентябрда содир бўлган. Россияда 3 сентябрь хотира куни сифатида белгиланган.

Эслатиб ўтамиз, жорий йилнинг 9 май куни бўлиб ўтадиган Иккинчи жаҳон урушидаги Ғалабанинг 80 йиллигига бағишланган тантанали маросимда иштирок этиш учун 20 дан ортиқ давлат ва ҳукумат раҳбарлари Россия пойтахти Москвага боради. Парадда Европа Иттифоқи давлатларидан бирининг етакчиси – Словакия Бош вазири Роберт Фицо ва Европа Иттифоқига номзод давлат раҳбари, Сербия Президенти Александр Вучич иштирок этади. Бундан ташқари, 9 май куни Москвага Хитой Раиси Си Цзиньпин, Венесуэла Президенти Николас Мадуро, Беларусдан Александр Лукашенко ва бошқалар боришни режалаштирмоқда.