Тожикистон афғон қочқинларининг оммавий депортация қилинишини тан олди

Тожикистон расмийлари республикада истиқомат қилаётган афғон қочқинларининг оммавий депортация қилингани фактини расман тасдиқлади. Бу ҳақда Тожикистон Миллий хавфсизлик давлат қўмитаси Чегара қўшинлари матбуот маркази хабар берди.

Қайд этилишича, “минтақадаги ва жаҳондаги мураккаб сиёсий ва иқтисодий вазият” фонида чет элликларнинг мамлакатга кириб бориши сезиларли даражада ошган. Шу билан бирга, кўплаб мигрантлар мамлакатда бўлиш қоидаларини бузган.

Текширувлар давомида кўплаб миграция режимини бузиш ҳолатлари, жумладан, наркотик моддаларнинг ноқонуний айланиши, экстремизмни тарғиб қилиш, қочқин мақомини олиш учун ҳужжатларни қалбакилаштириш, Тожикистондан транзит ҳудуд сифатида фойдаланиш ҳолатлари аниқланган. Шу муносабат билан қонунбузарларни республика ҳудудидан чиқариб юбориш чоралари кўрилаётгани алоҳида таъкидланган. Хусусан, бу Афғонистон фуқароларининг маълум бир қисмини депортация қилиш билан боғлиқ.

Июль ойи бошида маҳаллий нашрлар Тожикистондаги афғон муҳожирларига 15 кун ичида мамлакатни тарк этиш ультиматуми қўйилгани ҳақида хабар берган эди. Шундан сўнг, Душанбе, Ваҳдат ва Рудакий ҳудудларида ҳибс ва депортациялар тўлқини бошланган. Гувоҳларнинг сўзларига кўра, ҳибсга олишлар кўпинча уларнинг иш жойларида содир бўлмоқда ва ҳибсга олинганларнинг қариндошлари кўпинча уларнинг тақдири ҳақида ҳеч қандай маълумот олмайди.

Оммавий ахборот воситаларида афғон қочқинларининг Тожикистондан оммавий равишда чиқариб юборилгани ҳақида бир неча бор хабар берилган. Республикадаги Афғон муҳожирлари қўмитаси раҳбари Мусаввир Баҳодурий аввалроқ расмийлар депортацияларни мамлакатдаги турмуш қоидаларига риоя қилмаслик билан оқлашини маълум қилган эди. Унга кўра, афғонлар “нотўғри соқол қўйгани, чет эл кийимини кийгани, номуносиб хатти-ҳаракатлари, спиртли ичимликлар истеъмол қилгани, низоларда қатнашгани, ижтимоий тармоқларда сиёсий баёнотлар бергани, диний тарғибот олиб боргани, ҳужжатсиз ишлагани, фуқароларни ҳақорат қилгани” учун чиқариб юборилади.

Эслатиб ўтамиз, аввалроқ Афғонистондаги “Толибон” муваққат ҳукуматининг миграция вазирлиги 28-29 май кунлари “номаълум сабабларга кўра” 49 нафар афғон муҳожири Тожикистондан депортация қилинганини маълум қилганди.