Tojikiston ham Markaziy Osiyoni rivojlantirish bo‘yicha shartnomaga qo‘shildi

Tojikiston Prezidenti Imomali Rahmon 28 avgust kuni XXI asrda Markaziy Osiyoni rivojlantirish bo‘yicha do‘stlik, yaxshi qo‘shnichilik va hamkorlik to‘g‘risidagi shartnomani imzoladi. Bu haqda Davlat rahbarining Matbuot xizmati xabar berdi.

Marosimda Qozog‘iston Respublikasi Bosh vaziri o‘rinbosari, Tashqi ishlar vaziri Murat Nurtleu ham qatnashdi. U Prezident qabulida bo‘ldi va suhbat chog‘ida siyosiy, savdo-iqtisodiy, madaniy-gumanitar xarakterdagi masalalar, shuningdek, ikki davlatning ushbu sohalardagi strategik sheriklik va ittifoqchilik ruhidagi hamkorligi muhokama qilindi. Shu bilan birga, parlamentlararo muloqotni rivojlantirishga alohida e’tibor qaratilib, uni izchil rivojlantirish ikki mamlakat o‘rtasidagi munosabatlarning butun yo‘nalishiga ijobiy ta’sir ko‘rsatayotgani ta’kidlandi.

Shuningdek, oliy darajadagi bo‘lajak uchrashuv va muloqotlar jadvali, shuningdek, MDH sammiti va Dushanbe shahrida bo‘lib o‘tadigan “Markaziy Osiyo – Rossiya” formatidagi uchrashuvga tayyorgarlik ko‘rish masalalari muhokama qilindi.

Imomali Rahmon tomonidan imzolangan XXI asrda Markaziy Osiyoni rivojlantirish bo‘yicha do‘stlik, yaxshi qo‘shnichilik va hamkorlik to‘g‘risidagi shartnomani har tomonlama hayotga tatbiq etish borasidagi hamkorlikdagi ishlar mintaqada tinchlik, barqarorlik va izchil taraqqiyotni ta’minlash va mustahkamlash omiliga aylanishi alohida ta’kidlandi.

Ma’lumot uchun, 2022 yil 21 iyul kuni Cho‘lpon-Ota shahrida Qozog‘iston, O‘zbekiston va Qirg‘iziston Prezidentlari tomonidan XXI asrda Markaziy Osiyoni rivojlantirish bo‘yicha do‘stlik, yaxshi qo‘shnichilik va hamkorlik to‘g‘risidagi shartnoma imzolangan edi. Tojikiston va Turkmaniston o‘z mamlakatlarida ichki tartib-qoidalarni bajarish zarurligini aytib, hujjatni imzolamagandi.

Hujjatga ko‘ra, mamlakatlar mintaqada tinchlik, barqarorlik va xavfsizlikni mustahkamlash yo‘lida yaqindan hamkorlik qilish majburiyatini oladi. Mamlakatlar harbiy va harbiy-texnik sohalarda hamkorlikni rivojlantiradi. Zarur hollarda tomonlar o‘z mustaqilligi, suvereniteti va hududiy yaxlitligiga tahdidlarning oldini olish uchun bir-birini har tomonlama qo‘llab-quvvatlash va o‘zaro yordam ko‘rsatish majburiyatini oladi. Davlatlar bir-birining suvereniteti, xavfsizligi, barqarorligi va hududiy yaxlitligiga zarar yetkazadigan holda uchinchi davlatlar tomonidan o‘z hududlari, aloqa tizimlari va boshqa infratuzilmalaridan foydalanishiga yo‘l qo‘ymaslik majburiyatini oladi.

Mamlakatlar iqtisodiy hamkorlikni chuqurlashtirish, qo‘shma korxonalar yaratish, mintaqaning tranzit va transport salohiyatini rivojlantirish, yangi temiryo‘l, avtomobil, havo va suv kommunikatsiyalarini yaratish, transchegaraviy tashish tartiblarini soddalashtirishni rejalashtirmoqda.