“Тоттенхем”нинг икки нафар ҳужумчиси автоҳалокатга учради

Лондонинг “Тоттенхем” жамоаси ҳужумчилари Рандаль Коло-Муани ва Уилсон Одобер кичик йўл-транспорт ҳодисасига учради. Бу ҳақда кеча, 27 январь куни жамоа бош мураббийси Томас Франк маълум қилди.

Франкнинг сўзларига кўра, автоҳалокат Франкфуртга жўнаб кетиш арафасида содир бўлган, бироқ у ҳодисанинг барча тафсилотларидан хабардор эмас.

“Афсуски, иккаласи ҳам кичик бахтсиз ҳодисага учради. Энг муҳими — ҳодисада иштирок этганларнинг барчаси соғ-саломат”, дейди Франк журналистларга.

Унинг айтишича, футболчиларнинг ҳолати яхши ва уларнинг Чемпионлар лигасида “Айнтрахт Франкфурт”га қарши баҳсда майдонга тушишига умид катта.

“Бу шинанинг портлаши сабабли юз берган. Шу боис улар бир оз кечикишди, аммо бугун кечқурун Франкфуртга етиб боришади. Улар бир машинада бўлганми ёки йўқми, аниқ билмайман”, дея қўшимча қилди жамоа бош мураббийси.

Мураббий футболчилар билан ҳали шахсан гаплашмаганини, аммо дастлабки маълумотларга кўра уларнинг аҳволи яхши эканини таъкидлади.

“Улар кейинроқ учиб келишади ва мен иккаласи ҳам эртанги ўйинга тайёр бўлишига тўлиқ умид қиламан”,  дейди Франк.

Маълумот учун, айни пайтда “Тоттенхем” Чемпионлар лигаси турнир жадвалида 14 очко билан бешинчи ўринда бормоқда ва камида плей-офф босқичига йўлланмани аллақачон кафолатлаган. “Айнтрахт Франкфурт”га қарши учрашувдаги ғалаба эса клубга кучли саккизликдан жой олиш имконини беради.