Тошкентга олиб келинаётган 3 тонна яроқсиз товуқ гўшти тўхтатиб қолинди

Сотиш учун Бухоро вилоятидан Тошкент шаҳрига олиб келинаётган 3 тонна яроқсиз товуқ гўшти тўхтатиб қолинди. Бу ҳақда ЎзА хабар берди.

Қайд этилишича,  Навоий вилояти ИИБ ЖХХ ЖТСБ Карантин тадбирларини ташкил этиш гуруҳи ҳамда ветеринария ва чорвачиликни ривожлантириш бошқармаси ходимлари билан ҳамкорликда истеъмолга яроқсиз гўшт маҳсулотини сотмоқчи бўлган фуқаро аниқланган.

Бухородан Тошкентга қараб ҳаракатланаётган, 20 ёшли ҳайдовчи бошқарувидаги юк машинаси “Самарқанд” ЙПХ масканида тўхтатилган. Истеъмол маҳсулотларини ташиш қоидаларига зид ҳолда олиб келинаётган 3 тонна товуқ гўшти текшириш учун лабораторияга жўнатилган.

Текширувлар натижасига кўра, товуқ гўшти истеъмолга яроқсиз деб топилган ҳамда қоидабузарга қонуний тартибда жавобгарлик белгиланган.

Эслатиб ўтамиз, аввалроқ Тошкент шаҳрига 600 килограмдан ортиқ истеъмолга яроқсиз гўшт олиб кирмоқчи бўлган шахслар ушланганди.

Сарвар Хуррамов