Toshkentdagi yirik savdo do‘konining tomiga o‘t ketdi (video)

Bugun, 15 may kuni Toshkent shahar Sergeli tumanida joylashgan yirik savdo do‘konlarining birida yong‘in chiqdi. Bu haqda Favqulodda vaziyatlar vazirligi xabar berdi.

Qayd etilishicha, soat 10:15 da Sergeli tumani Sergeli-3 dahasi Qipchoq ko‘chasida joylashgan “Havas” do‘koning tom qismida yong‘in sodir bo‘lgani to‘g‘risida FVBga xabar tushgan.

Shunga ko‘ra, 4 ta yong‘in-qutqaruv ekipaji soat 10:21 da voqea joyiga yetib borib, hozirda uni bartaraf etish ishlari olib borilmoqda. Vaziyat to‘liq nazoratga olingan. Voqea joyiga Toshkent shahar va tuman FVB rahbar xodimlari yetib borgan. Birlamchi ma’lumotlarga ko‘ra, tan jarohati olganlar to‘g‘risida ma’lumot tushmagan. Yong‘in soat 11:00 da qurshab olingan va soat 11:04 da bartaraf etilgan.

Do‘kon ma’muriyatining QALAMPIR.UZ'ga ma’lum qilishicha, yong‘inning sababi bino tomiga egasi tomonidan o‘rnatilgan quyosh paneli bo‘lgan.

Eslatib o‘tamiz, avvalroq Toshkent shahrining Sergeli tumanida joylashgan omborxonada yong‘in sodir bo‘lgandi.