Тошкентдаги каналлардан бирида Нил тимсоҳи топилди (видео)

−

image

Жорий йилнинг 15 ноябрь куни Тошкент шаҳридаги каналларидан бирида Нил тимсоҳи топилди. Тимсоҳ Тошкент ҳайвонот боғига оғир аҳволда, кучли совқотган ҳолда олиб борилган. Бу ҳақда ҳайвонот боғи маъмурияти хабар берди.

Қайд этилишича, балиқчилардан бири шаҳар каналларидан бирида тимсоҳни кўриб қолган ва бу ҳақда тегишли хизматларга хабар берган. Шундан сўнг, Экология ва иқлим ўзгариши миллий қўмитаси ҳамда ҳайвонот боғи мутахассислари уни хавфсиз тарзда тутиб, зоопаркка олиб борган.

Маълум бўлишича, бу тахминан бир ёшгача бўлган Нил тимсоҳи. У ҳайвонот боғига олиб борилганида жуда оғир, кучли совқотган ҳолатда бўлган. Шу сабабли, карантин бўлимига жойлаштирилиб, махсус сув ҳавзасига қўйилган. Сув ҳарорати босқичма-босқич кўтарилган ва иситиш чироқлари ўрнатилган.

Мутахассиснинг айтишича, тимсоҳ совуқ сувда узоқ вақт қолиб кетган. Зарур шароитлар яратилганидан кейин унинг аҳволи бироз яхшиланган. Ҳозирда ҳайвоннинг ҳолати ўртача қониқарли деб баҳоланмоқда, тўлиқ тикланиши учун эса яна вақт керак.

Шунингдек, мутахассислар тимсоҳнинг каналга ўз-ўзидан тушиб қолмаган бўлиши мумкинлигини айтган. У кимнингдир уйида сақланган, кейин эса боқиш имкони бўлмагани сабаб сувга ташлаб юборилган бўлиши тахмин қилинмоқда. Бироқ бу ҳозирча тахмин.

Ҳодиса жойи ҳам мутахассислар томонидан кўздан кечирилган. Яқин атрофда бошқа судралиб юрувчилар аниқланмаган. Ҳайвонот боғи фуқароларни табиий муҳитига хос бўлмаган жойда экзотик ҳайвонни учратганда уни мустақил тутиш ёки ҳайдашга уринмасликка чақирган. Бундай ҳолатларда тегишли хизматларга хабар бериш лозим.

Эслатиб ўтамиз, аввалроқ Тошкент шаҳри Мирзо Улуғбек туманидаги компьютерхона ертўласида ёввойи ҳайвон – маймун сақланаётгани аниқлангани ҳақида хабар берилган эди.


Rate Count

0

Rating

3

Rate this article

Share with your friends