Тошкентда видеоларни тарқатиш билан “шантаж” қилган йигит ушланди (видео)

Тошкент шаҳрида сир тутилиши керак бўлган расм va видеоларини тарқатиш билан “шантаж” қилган 25 ёшли йигит ушланди. Бу ҳақда Тошкент шаҳар Ички ишлар бош бошқармаси хабар берди. 

Маълум бўлишича, Тошкент шаҳар ИИББга фуқаро мурожаат қилиб, ундан товламачилик йўли билан пул талаб қилаётган шахсга нисбатан қонуний чора кўришни сўраган.

Аниқланишича, 2001 йилда туғилган 25 ёшли фуқаро жабрланувчига тегишли, сир тутилиши керак бўлган фото-видеоларни ижтимоий тармоқларда тарқатиш билан қўрқитган. Бунинг эвазига жабрланувчидан 200 АҚШ доллар миқдорида пул беришини талаб қилган.

Жабрланувчининг мурожаати асосида Қобил исмли шахс товламачилик йўли билан жабрланувчидан талаб қилган 200 АҚШ доллар миқдоридаги пулларни олган пайтда далилий ашёлар билан ушланган.

Мазкур ҳолат юзасидан Жиноят кодексининг 165-моддаси (товламачилик) билан жиноят иши қўзғатилган.

Эслатиб ўтамиз, аввалроқ Андижон вилоятида товламачилик орқали пул ишламоқчи бўлган жиноий гуруҳ аниқлангани ҳақида хабар берилганди.