Тошкентда вагон устида селфи қилмоқчи бўлган болаларни ток урди

Тошкент шаҳрининг Юнусобод туманида вагон устида селфига тушмоқчи бўлган икки болани электр токи урди. Бу ҳақда “Миллар” хабар берди.

Маълум қилинишича, ушбу ҳолат туманнинг “Жоме” бозори яқинидаги “Чуқурсой” темирйўл станциясида содир бўлган.

Келтирилган маълумотларга кўра, ердан 1 метр баландликка кўтарилган бола катта кучланишдаги ток сабаб куйгандан кейин вагон четидаги зинага осилиб қолган.

Воқеа жойига чақирилган тез ёрдам машинаси дастлаб болаларга биринчи ёрдам кўрсатган. Шундан кейин болалар республика шошилинч тиббий ёрдам илмий марказига олиб кетилган. Билдирилишича, болаларнинг бири 12, яна бири 13 ёшда бўлган. Уларда умумий ҳисобда 50 фоиз куйиш жароҳати аниқланган.

Эслатиб ўтамиз, ўтган йилнинг сентябрь ойида Фарғона вилояти Учкўприк туманида поезд вагонлари устида селфи тушмоқчи бўлган мактаб ўқувчиларини ҳам ток урган эди. Улар бекатда турган буғдой ташувчи вагоннинг устига чиқиб, селфи тушмоқчи бўлган вақтларида эҳтиётсизлиги оқибатида икки нафар ўсмирни юқори кучланишли электр токи урган.