Тошкентда курьер билан жанжаллашган ресторан ходими қамалди

Тошкент шаҳридаги “Brasserie Park” ресторани олдида скутерда ҳаракатланаётган курьерни ҳақорат қилган эркак 5 суткага маъмурий қамоққа олинди. QALAMPIR.UZ суд ҳужжати билан танишди

.Аввалроқ, ижтимоий тармоқларда ресторан ходимининг ҳудудга скутерда кириб келган 17 ёшли курьер билан жанжаллашгани акс этган видео тарқалган эди. Унда ходим курьерни ҳақорат қилиб, унинг ресторанга кириб келиши хўрандаларга халақит бераётганини айтган. Ушбу ҳолат ижтимоий тармоқларда кенг муҳокамаларга сабаб бўлиб, фойдаланувчиларнинг эътирозларига олиб келди. Шундан сўнг “Мовий гумбазлар” хиёбонида жойлашган Brasserie ресторанининг ёзги майдончасида қонунбузилишлар аниқланиб, ҳудуд қонунчилик талабларига мувофиқ ҳолатга келтирилган.

Қайд этилишича, воқеа жорий йилнинг 17 октябрь куни соат 15:30 атрофида Ислом Каримов кўчасида жойлашган Brasserie ресторани олдида содир бўлган. “ONE MORE” МЧЖда ҳайдовчи бўлиб ишлайдиган С.Р. скутерда ҳаракатланаётган курьерга бу ерда ҳаракатланмаслиги кераклигини айтган. Ўртада келиб чиққан келишмовчилик ортидан у курьерни уятли сўзлар билан ҳақорат қилган. Ҳолат акс этган видео ижтимоий тармоқларда тарқалган.

Суд мажлисида С.Р. айбига қисман иқрор бўлиб, жаҳл устида курьерни сўкканини тан олган ва қилмишидан чин кўнгилдан пушаймонлигини билдирган.

Суд С.Р. нинг ҳаракатларини Маъмурий жавобгарлик тўғрисидаги кодекснинг 183-моддаси, яъни майда безорилик деб баҳолаб, унга 5 сутка маъмурий қамоқ жазоси тайинлаган. Шу билан бирга, ички ишлар ходимларининг қонуний талабларига бўйсунмаслик ва ҳақорат қилиш бўйича айбловлар тегишли далиллар билан тасдиқланмагани сабабли ишнинг ушбу қисмлари тугатилган.

Шунингдек, С.Р.дан махсус қабулхонада сақлаш харажатлари учун 330 минг сўм ундирилиши белгиланган.