Тошкентда “кўча решалалари” пайдо бўлдими? (видео)

Бугун, 15 октябрь куни ижтимоий тармоқларда Тошкент шаҳар Юнусобод туманидаги офислардан бирида бир нечта шахслар бошқа фуқароларга куч ишлатаётгани акс этган видео тарқалиб, турли муҳокамаларга сабаб бўлди. Мазкур ҳолат юзасидан пойтахт Ички ишлар бош бошқармаси муносабат билдирди.

Ўрганиш жараёнида маълум бўлишича, видеода акс этган ҳолат Юнусобод туманидаги “Гиёҳвандлик ва спиртли ичимликка ружу қўйган шахсларни даволаш”га ихтисослашган хусусий клиникада жорий йилнинг январь ойида рўй бергани аниқланган. Видеода клиникага даволаниш учун келтирилган беморларнинг агрессив ҳаракатлари ва беморларни тинчлаштиришга уринган ходимларнинг ҳаракатлари акс этган.

“Муҳокамаларга сабаб бўлаётган “кўча безорилари” каби важлар хақиқатдан йироқ. Ушбу ҳолат юзасидан фуқаролар ва уларнинг яқинлари томонидан илгари ИИОга ариза билан мурожаат қилинмаган”, дейилади хабарда.

Билдирилишича, ҳозирда Тошкент шаҳар ИИББ раҳбарияти бошчилигидаги ишчи гуруҳ томонидан терговга қадар текширув ўтказилмоқда. Якуни бўйича қонуний қарор қабул қилиниши таъминланади. Жараён Ички ишлар вазири томонидан назоратга олинган.

Эслатиб ўтамиз, аввалроқ Самарқанд вилоятининг Ургут туманида уч шахс укасини ургани учун бошқа бир эркакни ваҳшийларча калтаклаганди.