Тошкентда 9 кишини Германияга ишга юбориш билан алдаганлар қўлга тушди

Тошкентда фуқароларни Германияга ишга юборишни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, департаментнинг Юнусобод тумани бўлими томонидан ўтказилган терговга қадар текширувда “F.A.” МЧЖ раҳбари Ж.Б. ва менежери А.А. (муқаддам судланганлар) фуқароларни гўёки Германия давлатига ишга юбориши ҳақида ижтимоий тармоқларга эълон жойлаштириб, ушбу эълон бўйича мурожаат қилган 9 нафар фуқаро билан сохта шартномалар тузган. Улардан жами 12 500 доллар ва 73,2 млн сўм пулларни фирибгарлик йўли билан қўлга киритган.

Билдирилишича, мазкур ҳолатлар юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ 4 та ҳудудда АҚШ, Япония ва Кореяга ишга юборишни ваъда қилган шахслар қўлга тушганди.