Тошкентда 4 та самолётга кучли туман сабаб қўнишга рухсат берилмади

Тошкентда ноқулай об-ҳаво, яъни кучли туман сабаб 4 та самолёт бошқа аэродромларга қўндирилди. Бу ҳақда “Uzbekistan Airports” хабар берди.

Маълум бўлишича, бугун 18 февраль куни Тошкент халқаро аэропортида кучли туман ҳолати кузатилган. 

Қайд этилишича, “Centrum Air” авиакомпаниясининг Санкт-Петербург-Тошкент йўналишидаги C6422 рейси экипажи Навоий аэропортига қўндирилган.

“Turkish Airlines” авиакомпаниясининг Истанбул-Тошкент йўналишидаги THY368 рейси экипажи Самарқанддаги муқобил аэродромга юборилган.

Яна бир “Centrum Air”  авиакомпаниясининг Жидда-Тошкент йўналишидаги C6322 рейси экипажи Самарқанддаги муқобил аэродромга қўндирилган.

“Centrum Air” авиакомпаниясининг Гуанчжоу-Тошкент йўналишидаги C6512 рейси экипажи Самарқанддаги муқобил аэродромга йўналишни ўзгартирган.

“Тошкент халқаро аэропортида самолётлар одатий режимда учмоқда. Чекловлар рейсларни қабул қилишга ўрнатилган”, дейилади хабарда.

Эслатиб ўтамиз, аввалроқ Тошкент аэропортидаги ноқулай об-ҳаво, яъни кучли чақмоқ чақиши сабабли 3 та рейс бошқа аэродромларга қўнишга мажбур бўлгани ҳақида хабар берилганди.