Rossiya sobiq transport vazirining o‘limi ortida nimalar yoki kimlar turibdi?

Mansab postidan olinishi bilan o‘z joniga qasd qilgani aytilayotgan Rossiyaning sobiq transport vaziri Roman Starovoytning so‘nggi kuni va ungacha bo‘lgan harakatlari haqida yangi tafsilotlar ma’lum bo‘lmoqda. Bundan tashqarii, marhum vazirni o‘zini o‘ldirishgacha olib borgan jinoyat ishi qay darajada jiddiy bo‘lishi mumkinligi va uning bu ishlaridan yana kimlar xabardorligi tekshirilmoqda. Asosiy nishon esa avvalgi dasturlarda nomi tilga olingan hurliqo, vazirning yordamchisi, gap-so‘zlarga qaraganda esa undan-da yaqin kishisi bo‘lib kelgan Polina ismli 25 yashar ayol bo‘lishi mumkin.

Yana nimalar ma’lum?

Rossiya Tergov qo‘mitasi sobiq transport vaziri Roman Starovoytning o‘limi bilan bog‘liq holatlar o‘rganilayotganini ma’lum qildi. Hozircha esa tergovchilarning asosiy versiyasida kutilganidek o‘z joniga qasd qilish. Ammo rasmiy ma’lumotlarga ko‘ra, Roman Starovoytning o‘lim sanasi hozircha aniq emas. “Baza” ma’lumotlariga ko‘ra, u o‘z joniga qasd qilishni 6 iyul kuni kechasi amalga oshirgan bo‘lishi mumkin. “Forbes” manbasi ham aynan shu sanani qayd etgan. “Baza”ning yozishicha, o‘limiga bir necha soat qolganida Starovoyt qizining musobaqasiga borgan, u yerda taxminan bir soatdan kamroq bo‘lib, keyin uyiga jo‘nab ketgan. Shu bilan birga, Rossiya Transport vazirligi 6 iyul kuni Starovoyt Ust-Luga port shahrida ammiak chiqindisi bilan bog‘liq favqulodda holat bo‘yicha yig‘ilish o‘tkazganini ma’lum qilgan.

“Mash” telegram-kanali esa, umuman boshqa fikrda, ya’ni kanalga ko‘ra, Starovoyt 7 iyul kuni ertalab vazirlikda ishda bo‘lgan, yig‘ilish o‘tkazgan, hamma bilan xayrlashgan va uyiga ketgan. “Mash” bu versiyani Starovoyt oxirgi xabarini o‘z shaxsiy qo‘riqchilariga yuborgani, uni qayerda va qaysi vaqtda olib ketishlarini bildirgani bilan asoslamoqda. Ushbu versiyaga ko‘ra, aynan qo‘riqchilar uning jasadini topishgan. “Mash” telegram-kanali xabar berishicha, siyosatchi 11:00 atrofida o‘zini o‘ldirgan. Marhumning jasadi yonida 2023 yili IIV rahbariyati tomonidan sovg‘a qilingan qurol topilgan. O‘shanda sovg‘a sifatida berilgan ushbu qurol Starovoytga “muammolarni hal etishda ko‘rsatgan xizmati” uchun taqdim qilingani qayd etilgan. Bundan kelib chiqadiki, vazir o‘zini aynan shu o‘qotar qurol bilan o‘ldirgan bo‘lishi mumkin.

“Baza” manbasiga ko‘ra, Starovoyt oxirgi marta oila a’zolari bilan 5 iyul kuni muloqot qilgan. U qizining musobaqasiga tushkun holda kelgan, taxminan bir soatdan kamroq vaqt o‘tib, jimgina ketgan. Shundan so‘ng u hech kim bilan bog‘lanmagan.

20 yillik qamoqdan qochish?

Staravoyt 2024 yil may oyida Transport vaziri etib tayinlangandi va bir yildan ortiq shu lavozimda ishladi. Avvalroq, Kursk viloyatidagi korrupsiya bilan bog‘liq holatlar uning ishdan olinishiga sabab bo‘lgan bo‘lishi mumkinligi taxmin qilingandi. Kreml esa uning ishdan olinishi ishonchni yo‘qotishga bog‘liq emasligini ma’lum qilganiga qaramay, Starovoyt iste’fosining sabablariga aniqlik kiritmadi.

Hozirgacha esa aynan Kurskdagi korrupsiyaviy jinoyatlar Starovoytning o‘z hayoti bilan bog‘liq so‘nggi qarorini qabul qilishda hal qiluvchi rol o‘ynagani eng ko‘p aytilayotgan versiya bo‘lib turibdi. Starovoyt 2019-2024 yillarda Kursk viloyati gubernatori bo‘lgan. Undan keyin viloyat rahbarligini Aleksey Smirnov vaqtincha bajargan. Smirnov esa Ukraina Kurskni egallaganidan ko‘p o‘tmay lavozimidan olindi va 2025 yil aprel oyida Ukraina bilan chegarada qurilgan mudofaa inshootlari uchun ajratilgan 1 milliard rubldan ortiq byudjet mablag‘ini talon-taroj qilishda ayblandi va hozirda Smirnov va uning o‘rinbosari Aleksey Dedov hibsda. SHOT telegram-kanali ma’lum qilishicha, aynan Smirnov Starovoytga qarshi birinchilardan bo‘lib, ko‘rsatma bergan va o‘z amaliyotini uning ko‘rsatmasiga asosan amalga oshirganini aytgan. Ya’ni Starovoyt firibgarlik va noqonuniy tasarruf etish moddalari bo‘yicha jinoiy ish ochilgan taqdirda 20 yilgacha qamalishi mumkin edi.

“Mash” kanali esa, marhum vazir tomonidan havoga sovurilgan pullar miqdorini yanada kattaroq qilib ko‘rsatmoqda. Manbaga ko‘ra, uning 19 milliard rublni kerakli joylarga sarf qilish haqidagi ruxsatnomasi huquq-tartibot organlarida shubha uyg‘otgan. Uning imzosi Kursk viloyatidagi operativ shtab qarorlarida ko‘rinadi. U yerda bosh pudratchi – viloyatni rivojlantirish korporatsiyasiga 19 milliard rublni mustaqil ravishda sarf qilish va subpudratchilarni ham o‘zi tanlash huquqi berilgan. Ammo xabarga ko‘ra, ushbu korporatsiya Durnevo qishlog‘ida Starovoyt uchun rezidensiya qurgan. U gubernatorlik paytida o‘sha yerda yashagani aytilmoqda. “Baza” ma’lumotlariga ko‘ra, korporatsiyaning sobiq rahbari Vladimir Lukin va deputat Maksim Vasilev ushbu ish bo‘yicha ko‘rsatma bergan va oldinroq ma’lum qilinganidek, hozirda ular ham tergov hibsxonasida saqlanmoqda.

25 yoshli Polina ham nishondami?

Odinsovodagi dramatik sahnaning asosiy markazida Starovoytning bir necha yillardan buyon yaqin insoniga aylangan, rasmiy jihatdan esa uning yordamchisi bo‘lgan Polina Korneyeva o‘rin oldi. Manbalarga ko‘ra, u vazirning jonsiz jasadini ko‘rishi bilan shokka tushgan, yig‘lagan va nima bo‘lganiga ishonmagan. Voqea joyiga yetib kelgan militsiya xodimlari uning ahvolidan hayratda qolishgani, yosh ayolning bunday samimiy qayg‘usidan ta’sirlangani aytilmoqda.

Voqea joyida ishlayotgan politsiya xodimlari nafaqat fojia holatlaridan, balki Polinaning rolidan ham hayratda qolishgan. Uning hissiy munosabati va Starovoytga yaqinligi tergovchilarning unga alohida e’tibor berishiga sabab bo‘lgan. Shu bois tergov, Polinaning Starovoytga qo‘yilishi mumkin bo‘lgan ayblovlar haqida oldindan xabari bo‘lgan yoki yo‘qligini tekshirayotgani haqida xabarlar bor. Manbalarga ko‘ra, huquq idoralari uning da’vo qilingan qonunbuzarliklar bilan bog‘liq biznes masalalariga aloqadorligini aniqlash uchun yozishmalar va hujjatlarni tekshirmoqda. Ammo Polina Korneyeva hozircha faqatgina guvoh va uning ko‘rsatmasi tergovda hal qiluvchi ahamiyat kasb etishi mumkin.