Тереза Мэй Британия парламентини ҳам тарк этадиган бўлди

Буюк Британиянинг собиқ бош вазири Тереза Мэй 27 йил ичида биринчи марта навбатдаги парламент сайловларида номзод сифатида қатнашмайди. Бу ҳақда сиёсатчининг "Maidenhead Advertiser" нашрида чоп этилган баёнотида маълум қилинди.

Мэй шу тариқа Консерваторлар партиясининг жорий йилга белгиланган сайловларда иштирок этишдан бош тортганини эълон қилган навбатдаги вакили бўлди. Ундан аввал, 2022 йилда лавозимини тарк этган собиқ бош вазир Борис Жонсон ҳукмрон Консерватив партия етакчиси ва ҳукумат раҳбари лавозимига номзод сифатида сайловда қатнашмаслигини айтган. 

Мэйнинг тушунтиришича, у энди бошқа лойиҳаларга, жумладан, 2022 йилда ташкил этилган Замонавий қуллик ва одам савдоси бўйича глобал комиссия (халқаро ташаббус гуруҳи)га эътибор қаратмоқчи.

“Бу масалалар кўпроқ вақтимни олади. Шунинг учун ҳам ўйланиб, масалани ўрганганимдан сўнг, келажакка назар ташлаб, энди парламентда депутатлик вазифамни бажара олмаслигимни англадим. Мен буни тўғри деб ҳисоблайман ва менинг сайловчиларим ҳам буни қўллаб-қувватлайди. Шу сабабдан мен навбатдаги умумий сайловда қатнашмаслик бўйича қарор қабул қилдим", деган 67 ёшли Мэй.

Маълумот учун, Тереза Мэй 2016 йил июлида ўзидан олдинги бош вазир Дэвид Кэмерон (2010-2016) истеъфога чиққанидан кейин ҳукумат раҳбари лавозимига тайинланган. 2019 йилда ҳукумат  ва Консерватив партия раҳбари лавозимини тарк этган Мэйнинг ўрнига Борис Жонсон (2019-2022) келган. Аёл юқори раҳбарлик лавозимини тарк этгач, Англиянинг жануби-шарқидаги ўз сайлов округи бўйича парламент аъзоси бўлиб, кейинги фаолиятини депутат ўлароқ давом эттирган ва шу билан бирга оммавий тадбирларда чиқиш қилиб даромад олган. "Sky News" маълумотларига кўра, у ўз чиқишлари ортидан, 2019 йилдан бери 2,5 миллион фунт (3,2 миллион доллар) даромад олган.

Қайд этиш керакки, Бирлашган Қиролликнинг навбатдаги умумий сайлови 2025 йилнинг 28 январидан кечиктирмай ўтказилиши керак. Бош вазир Риши Сунак сайловни 2024 йилнинг иккинчи ярмида ўтказиш ниятида эканини билдирган.