Telegram сторислар функциясини ишга туширди

Хабарлар меcсенжери Telegram  узоқ кутилган сторислар хизматини тақдим этди. Унга кўра, фойдаланувчилар маълум вақтдан кейин йўқ бўлиб кетадиган янги ҳикояларни ўз аккаунтлари орқали улашишлари мумкин. Бу ҳақда Telegram маълум қилди.

Ҳикояларни нашр этиш менюсига чат ойнасининг юқори ўнг томонидаги янги белгисини босиш орқали кириш мумкин. Унинг ёнида аллақачон таниш бўлган "хабар ёзиш" тугмаси мавжуд. Юқори қисмида, шунингдек, контактлардаги барча ҳикоялар рўйхатини акс эттирувчи меню жойлашган. Оддий ҳолатда меню минималлаштирилади ва "чатлар" сўзи ёнида кичик белги билан кўрсатилади. Агар экран пастга тортилса, менюнинг тўлиқ версияси очилади ва маълум бир фойдаланувчини танлаш имконияти пайдо бўлади.

Бундан ташқари, нашр менюсига кириш орқали, камера ойнасини очиш мумкин. Бошқа иловалардан фарқли ўлароқ энди Telegram'да бир вақтнинг ўзида иккита камерадан фойдаланиш имконияти мавжуд. 

"Кўп йиллар давомида фойдаланувчиларимиз биздан Telegram`да сторисларини жорий этишимизни сўрашади. Биз олган барча сўровларнинг ярмидан кўпи ҳикоялар билан боғлиқ. Дастлаб, биз бунга қарши эдик, чунки ҳамма жойда сторислар мавжуд. Бироқ, агар биз фойдаланувчиларимизни тингламасак ва мавжуд форматларни янгиламасак, Telegram  Telegram  бўлмайди ", деди Telegram  асосчиси Павел Дуров.

Фойдаланувчилар нашрга қўшиш учун ўзларининг тўпламларидан стикерларни танлашлари мумкин. Тўпламда анимацион кулгичлар ҳам мавжуд. Стикерлар ўлчамини, айланиш даражасини ва экрандаги ўрнини ўзгартириш мумкин.

Бундан ташқари, месенжер фойдаланувчилари ўз сторисларини кимлар кўриши мумкин эканлигини белгилай олади. Бунда “контактлар”, “танланган бир нечта контактлар” ёки “яқин дўстлар” бўлимини танлаш имконияти мавжуд. Ушбу сторисларнинг амал қилиш муддати қачон тугашини белгилаш - 6, 12, 24 ёки 48 соатдан кейин ёки Профил саҳифасида ҳар бири учун шахсий махфийлик созламалари билан доимий равишда ҳикояларни кўрсатиш ҳам мумкин.

Ҳозирча сторислар функциясидан пулли Telegram Premium обуначилари фойдаланиши мумкин. Ҳикоялар билан Telegram  янгиланиши фақат iOC ва Android учун мавжуд. 

Эслатиб ўтамиз, Павел Дуров сторислар жойлаш функциясини ишга тушириш режаси ҳақида июль ойида маълум қилган.

Севара Ҳусниддинова