Ташиев хитойликлардан қирғиз тилини ўрганишни талаб қилди

Қирғизистон Миллий хавфсизлик давлат қўмитаси раиси Қамчибек Ташиев Хитойнинг “China Road” компанияси вакилларига қирғиз тилини ўрганишни буюрди. Бу ҳақда “24.kg” хабар берди.

Қайд этилишича, бу баёнот Иссиқкўл вилоятидаги йўл қурилиши бўйича йиғилишда билдирилган. Магистралнинг Барскоон-Қоракўл қисмида ким ишлаётгани ҳақида сўрагандан сўнг, Ташиев Қирғизистонда қарийб 20 йилдан бери фаолият юритиб келаётган компания вакиллари давлат тилини билмаслигини айтган.

“Нега ҳали қирғиз тилини ўрганмадингиз? “China Road” Қирғизистонда қанча вақтдан бери мавжуд? 20 йилдан бери! Демак, сиз қирғиз тилида гапира олмайсизми? Ўрганинг!”, дейди Қамчибек Ташиев.

Бундан ташқари, Миллий хавфсизлик давлат қўмитаси раҳбари 75 километрлик йўлнинг қурилиш муддатини муҳокама қилган. Компания вакили шартнома 2028 йил 1 сентябрда якунланиши режалаштирилганини, аммо ишни муддатидан олдин – 2027 йил охиригача якунлашга ҳаракат қилишга ваъда берган.

Эслатиб ўтамиз, аввалроқ ўзбек сўмини ёқиб, тамаки тутатган хитойликлар жазолангани ҳақида хабар берилганди.