Танташев мундиалнинг энг яхши ҳакамлари қаторига киритилди

Ўзбекистонлик футбол ҳаками Илгиз Танташев Халқаро футбол тарихи ва статистикаси федерацияси (IFFHS) томонидан 2026 йилги Жаҳон чемпионатининг энг яхши 10 нафар ҳаками қаторига киритилди. Бу ҳақда федерация матбуоти хабар берди.

Турнир якунларига кўра, Танташев рейтингда ўнинчи ўринни эгаллади. Рўйхат ҳакамларнинг тайинловлари сони, бошқарган ўйинлари даражаси, плей-офф босқичидаги фаолияти ҳамда интизомий кўрсаткичлари асосида тузилган.

Илгиз Танташев Жаҳон чемпионатида 3 та учрашувни бошқарди. У гуруҳ босқичида Шотландия – Марокаш ва Жазоир – Австрия ўйинларида, плей-оффда эса Парагвай – Франция баҳсида бош ҳакам сифатида ишлади.

IFFHS талқинига кўра, Испания ва Аргентина ўртасидаги финал учрашувини бошқарган словениялик Славко Винчич турнирнинг энг яхши ҳаками деб топилди. АҚШлик Исмоил Элфат иккинчи, сальвадорлик Иван Бартон эса учинчи ўринни эгаллади.

Шунингдек, кучли ўнталикдан франциялик Клеман Тюрпен, англиялик Майкл Оливер, португалиялик Жоау Пинейру, аргентиналик Факундо Тельо, венесуэлалик Хесус Валенсуэла ва иорданиялик Адҳам Муҳаммад ҳам ўрин олди.

Эслатиб ўтамиз, аввалроқ собиқ FIFA ҳаками Алексей Николаев Илгиз Танташев бошчилигидаги ҳакамлар бригадаси бошқарган Франция ва Парагвай ўртасидаги 1/8 финал учрашувини 2026 йилги Жаҳон чемпионатида ҳакамлик борасида энг кўп баҳс-мунозараларга сабаб бўлган учрашув деб атаганди.