Таиланд ва Камбоджа ўт очишни тўхтатишга келишиб олди – Трамп

АҚШ Президенти Дональд Трамп Таиланд ва Камбоджа Бош вазирлари – Анутхин Чанвиракун ва Хун Манет билан музокаралар ўтказди. Улар ўт очишни тўхтатишга рози бўлди. Бу ҳақда Оқ уй раҳбари ўзининг Truth Social тармоғида ёзиб қолдирди.

Америка етакчисининг айтишича, икки давлат раҳбарлари кеча, 12 декабрь тунидан бошлаб ўт очишни тўхтатишга рози бўлган. Трампнинг таъкидлашича, томонлар октябрь ойида тузилган тинчлик келишувига риоя этишга тайёр.

“Анутхин ва Хун билан (икки ажойиб ва равнақ топаётган давлат ўртасида) йирик урушга айланиши мумкин бўлган вазиятни ҳал этиш устида ишлаш мен учун шараф бўлди”, дея ёзган АҚШ Президенти. 

Трамп, шунингдек, можарони тартибга солишда кўрсатган ёрдами учун Малайзия Бош вазири Анвар Иброҳимга миннатдорлик билдирган. 

Таиланд ва Камбоджа ўртасидаги можаро 8 декабрь куни қайта авж олди. Ўшанда Таиланд армияси баҳсли чегара ҳудудлари бўйлаб авиазарбалар йўллаган. Таиланд Қироллик армияси 7 декабрь куни Сисакет провинциясида камбоджалик ҳарбийлар унинг шахсий таркибига ҳужум қилганини даъво қилди. Шундан сўнг, Камбоджа қўшинлари ўқотар қуроллар ва ракета қурилмаларидан жавоб ўқи очган. Камбоджа Мудофаа вазирлиги эса, аксинча, ҳужумни биринчи бўлиб таиландлик кучлар бошлаганини маълум қилди.

Эслатиб ўтамиз, аввалроқ Таиланд қироли Маха Вачиралонгкорн қуйи палатани тарқатиб юбориш ҳақидаги фармонни маъқуллаганди. Бош вазир Анутхин Чанвиракун томонидан имзоланган фармонда парламент тарқатиб юборилишининг асосий сабаби сифатида унинг маъмурияти “озчилик ҳукумати” мақомида экани кўрсатилган.