Сурхондарёда мактаб ўқувчиси ЙТҲ содир этди. 2 киши ҳалок бўлди

Сурхондарё вилоятида 16 ёшли йигит содир қилган йўл-транспорт ҳодисасида 2 киши ҳаётдан кўз юмди. Бу ҳақда “Ҳудуд” информацион дастурида хабар берилди.

Қайд этилишича, Жарқўрғон туманида вояга етмаган фуқаро отасининг Cobalt автомашинасида қарама-қарши йўналишда ҳаракатланиб кетаётганида Nexia автомобили билан тўқнашган. Ҳодиса оқибатида икки фуқаро вафот этган.

Йигитнинг қариндошларидан бири у дадаси ухлаётган пайтда машинани олиб чиқиб кетгани ва йўлнинг нотекис жойидан қочаман, деб Nexia’га бориб урилганини айтган.

“У Мингчинор маҳалласига ҳайдаб бориб, “подём”дан пастга тушаётганида чуқурдан олиб қочаман, деб “лобма-лоб” уради Nexia машинасига. Шунда икки киши ҳалок бўлди. Энди ҳамма қилган ишидан пушаймон, жияним 11-синф, 16 ёшдан ўтган, 17 ёшга тўлмаган”, деган у.

Автоҳалокатда Nexia ҳайдовчисининг онаси ва фарзанди ҳалок бўлгани маълум қилинди.

Эслатиб ўтамиз, аввалроқ Жиззахда 19 ёшли йигит Nexia’да “Камаз” билан тўқнашиб, вафот этганди.