Суриядаги кучларнинг қийинчиликсиз олға силжишига умид қиламиз – Эрдўған (видео)

Туркия Президенти Ражаб Тойиб Эрдўған Суриядаги мухолифат кучларнинг олға силжиши “муаммоларсиз давом этишига” умид қилмоқда. Бу ҳақда Эрдўған бугун, 6 декабрь куни Истанбулда журналистлар билан бўлган мулоқотда маълум қилган.

Президентнинг таъкидлашича, Туркиянинг кетма-кет амалга оширган қўнғироқларга қарамай, Сурия Президенти Башар Асаддан мавжуд муаммоларни икки томонлама муҳокама қилиш таклифига ижобий жавоб бўлмаган.

“Агар эсингизда бўлса, биз аввалроқ Асадга мурожаат қилиб, Суриянинг келажагини биргаликда белгилашни таклиф қилган эдик, афсуски, ҳалигача Асаддан ижобий жавоб ололмадик”, деган Туркия раҳбари.

У, шунингдек, Суриядаги кучларнинг олға силжиши “қийинчиликсиз давом этишига” умид қилишини қўшимча қилган.

“Мухолифатнинг юриши давом этмоқда. Идлиб билан ҳамма нарса аниқ. Ҳомс мухолифат қўлида ва биз уларнинг Дамашққа юриши ҳақида гапиряпмиз ва бу албатта амалга ошади. Минтақа оғир аҳволда ва бу юришлар биз хоҳлагандек эмас. Биз буни чин дилдан истамаймиз”, дея қўшимча қилган у.

Эслатиб ўтамиз, кеча, 5 декабрь куни Туркия Президенти Ражаб Тойиб Эрдўған Суриядаги вазият кескинлашаётган бир пайтда Миллий хавфсизлик кенгашининг энг муҳим йиғилишларидан бирини ўтказганди. Бўлиб ўтган йиғилишда миллий бирлик, бирдамлик ва омон қолиш учун ҳар қандай таҳдид ва хавфга қарши мамлакат ичкарисида ва хорижда олиб борилган ҳал қилувчи амалиётлар ҳақида маълумот берилган.