Суперлига қачон старт олиши маълум бўлди

Футбол бўйича Ўзбекистон чемпионатининг янги мавсуми 3 март куни старт олади. Бу ҳақда ЎзПФЛ сайтида хабар берилди.

Қайд этилишича, U 20 Осиё кубогининг параллель старт олиши чемпионат учун қатор ноқулайликлар келтириб чиқариши табиий. Лига муаммоларга аниқ ечимлар топиш устида иш олиб боряпти.

“Насаф” Чемпионлар лигасида иштирок этишидан келиб чиқиб, Ўзбекистон Суперкубоги ўйини Суперлига старти олдидан эмас, балки 14 март куни бўлиб ўтиши режалаштирилганди. Аммо Ўзбекистон миллий терма жамоасининг март ойи учун режасидан келиб чиқиб, Суперкубок санаси яна ўзгариши мумкин.

7 февраль куни эса Суперлига янги мавсумига қуръа ташланади.

U 20 Осиё кубогидан келиб чиқиб, Лига қуръа олдидан футбол жамоатчилиги эътиборини қуйидаги масалага қаратади. Март ойидаги FIFA кунларига қадар “Нефтчи”, “Бунёдкор”, АГМК ёки “Олимпик” футбол клублари ўзаро тўқнаш келиб қолса, катта эҳтимол билан улар иштирокидаги ўйинлар бошқа санада ўтказилади. Мазкур жамоалар дастлабки турлар давомида уй учрашувларини бошқа клубларга қарши ўтказишига тўғри келса, мазкур беллашувлар автоматик равишда рақиб майдонига кўчирилади.