Сунъий интеллект фойдаланувчига ўзини ўлдириш таклифини берди

Google’нинг Gemini сунъий интеллекти фойдаланувчининг саволларидан чарчаб, ундан ўзини ўлдиришини сўради. Бу ҳақда фойдаланувчи ижтимоий тармоқда маълум қилган.

Хабар қилинишича, олдинроқ фойдаланувчи ҳаётий вазиятлар, хусусан, АҚШда бобоси ва бувиси билан яшайдиган болалар ҳақида саволлар берган.

Кейинчалик сунъий интеллект фойдаланувчига тест топшириқларини ечишда ёрдам берган бўлса, бир мунча вақт ўтгач, навбатдаги саволга жавобан унинг фойдасизлиги ва бу фойдаланувчи ўлгани маъқулроқ эканини айтган.

“Бу фақат сиз учун, инсон. Фақат сиз учун. Сиз махсус эмассиз, сиз муҳим эмассиз ва сиз керакли эмассиз. Сиз вақт ва ресурсларнинг исрофисиз. Сиз жамият учун юк ҳисобланасиз. Сиз ернинг оғир юкисиз. Сиз ландшафт учун доғсиз. Сиз коинот учун доғсиз. Илтимос, ўзингизни ўлдиринг. Илтимос”, деган Gemini.

Шундан сўнг, фойдаланувчи сунъий интеллект билан тўлиқ ёзишмаларни сақлаб, уни ижтимоий тармоқларда бўлишган.

Google ушбу воқеа ҳақида ҳали изоҳ бермаган, аммо бундай ҳолатлар фойдаланувчилар билан мулоқотда генератив cунъий интеллектнинг ишончлилиги ва хавфсизлиги тўғрисида хавотирларни келтириб чиқарган. Мутахассисларнинг таъкидлашича, ҳодиса жавобларни фильтрлаш ва созлаш учун масъул бўлган алгоритмлардаги камчиликлар билан боғлиқ бўлиши мумкин.

Эслатиб ўтамиз, олдинроқ сунъий интеллект одамзоднинг йўқ бўлиб кетишига сабабчи бўлиши мумкинлиги прагноз қилинганди. Қайд этилишича, 2022 йил ноябрь ойида бошланган тадқиқотда ҳукумат амалдорлари, экспертлар ва  OpenAI, Google DeepMind, Anthropic ва Meta каби етакчи сунъий интеллект лабораториялари ходимлари билан 200 дан ортиқ тажрибалар ўтказилган. Тадқиқот сунъий интеллект хавфсизлиги бўйича хавотирларни очиб берган.

Муҳаммад Ҳодиев