Сулҳ бузилди: Исроил Байрутга кенг кўламли зарбалар берди

Исроил ва “Ҳизбуллоҳ” ўртасидаги сулҳ кучга кирганидан бери илк бор Исроил ҳарбий-ҳаво кучлари Байрут чеккасига авиазарба берди. Бу ҳақда BBC хабар берди.

Кеча, 6 май куни Биньямин Нетаньяху ва Исроил Мудофаа вазири Исраэль Кацнинг маълум қилишича, ҳужумнинг асосий нишони “Радван” элит бўлинмаси қўмондони бўлган.

Уларнинг айтишича, ушбу бўлинма жангчилари Исроил ҳудудларини ўққа тутиш ва Исроил ҳарбийларига ҳужумлар уюштириш учун масъул бўлган.

ОАВ маълумотига кўра, зарба оқибатида “Радван” қўмондони Малик Балут, унинг ўринбосари ва яна бир неча жангчи ҳалок бўлган.

Маълум қилинишича, Исроил махсус хизматлари аниқ разведка маълумотларини олганидан кейин ҳужум амалга оширилган. Балут Байрутнинг Даҳия туманидаги квартиралардан бирида яширингани айтилмоқда. Операция давомида тахминан ўнта оғир авиабомба ташланган.

Шунингдек, АҚШ ҳужум ҳақида олдиндан хабардор қилингани ва бунга розилик бергани айтилмоқда. Можаро яна кескинлашиши мумкинлиги сабабли Исроил шимолида юқори жанговар тайёргарлик ҳолати эълон қилинган.

Ливандаги сулҳ режими 17 апрель куни кучга кирган эди. Уни АҚШ Президенти Дональд Трамп ҳамда Нетаньяху билан ўтказилган музокаралардан кейин эълон қилган.

Шундан сўнг Трамп Ливан ва Исроил етакчиларини Оқ уйга учрашувга таклиф қилган эди. Аммо кейинчалик Исроил “Ҳизбуллоҳ”га қарши ҳарбий операция тугамаганини билдирган.

Можаро март ойида, АҚШ ва Исроилнинг Эронга қарши уруши бошланганидан кейин янада кескинлашган. “Ҳизбуллоҳ” АҚШ-Исроил авиация ҳужумлари оқибатида Эрон олий раҳбари Оятуллоҳ Али Хоманаий ҳалок бўлганидан сўнг, Исроилга ракета ҳужумларини қайта бошлаган.

Бунга жавобан Исроил авиацияси Байрут ва унинг атрофидаги ҳудудлар, шунингдек Ливан шарқидаги нишонларга кенг кўламли авиазарбалар берган.

Жанговар ҳаракатлар Ливан жанубини ҳам қамраб олган. Исроил армияси қуруқликдаги операция давомида мамлакат ичкарисига кириб борган ва чегара ҳудудларида “Ҳизбуллоҳ” жангчилари билан тўқнашувлар олиб борган.

Эслатиб ўтамиз, аввалроқ АҚШ Президенти Дональд Трамп Исроил Бош вазири Биньямин Нетаньяхуга Ливанга зарбалар бўйича тавсия берганди. Трамп Нетаньяхуни Ливанга фақат “аниқ нишонли” зарбалар беришга чақирган. Акс ҳолда, унинг фикрича, Исроил “ўзини ёмон кўрсатиб қўяди”.