Сўхдаги муаммоларни бартараф этишга 1 трлн сўм ажратилади. Ҳудуддаги ҳаёт қандай ўзгаради?

Кеча, 3 июнь куни Ўзбекистон Республикаси Бош Вазири Абдулла Арипов раҳбарлигида Сўх тумани ҳокимлигида йиғилиш бўлиб ўтди. Унда туманни обод қилиш ва келажакда қилиниши лозим бўлган ишлар ҳақида сўз юритилди. Бу ҳақда Сўх тумани ҳокимлиги Ахборот хизмати хабар бермоқда.

Маълум қилинишича, ҳудудда инвестиция соҳасида жорий йил давомида қиймати 101 млрд сўм бўлган 73 лойиҳа амалга оширилади. Бунинг натижасида 4,5 минг янги иш ўрни яратилиши кутилмоқда. Банклар кўмагида 82 лойиҳа амалга оширилиб, бунинг учун биргина Сўх тумани учун 153 млрд. сўм кредит йўналтирилади. Сўх туманидаги барча муаммоларни бартараф этиш учун 1 трлн. сўмга яқин маблағ ажратилиши режалаштирилган.

Ахборот хизматининг маълум қилишича, йиғилиш давомида сўхлик тадбиркорнинг цемент заводи қуриш бўйича тайёрлаган лойиҳаси ҳам қўллаб-қувватланган. Олтита маҳалла фуқаролар йиғинида кичик саноат ҳудудлари ташкил этилиши белгилаб олинган. Бундан ташқари, 3 та дам олиш маскани яратиладиган бўлди.

“Тумандаги марказий шифохона ҳамда қишлоқ врачлик пунктлари замонавий қиёфада таъмирланиб, замонавий тиббиёт ускуналари билан жиҳозланади. Давлатимиз раҳбари томонидан сўхлик ёшларнинг олий ўқув юртларига қабул қилиниши учун 500 та квота ажратиладиган бўлди. Яқин келажакда таълим соҳасидаги муаммолар ҳам тўлиқ бартараф этилиб, янги мактаб ва қўшимча бинолар қурилиши режалаштирилди. Эндиликда, сўхлик ёшлар олий ўқув юртларига қабул қилинаётганида ўз она тиллари – тожик тилида имтиҳон топширишларини ҳам йиғилишда маълум қилинди”, дейилади хабарда.

Йиғилишда ичимлик ва экинларни суғоришда ишлатиладиган сув масаласи кўтарилди. Сув хўжалиги вазирининг маълумотларига кўра, туманда сув захираси етарли, аммо асосий муаммо унинг етказиб берилишида. Тез фурсатларда бу масала ҳам ўз ечимини топади.

Шунингдек, Сўх туманидаги Симодон, Касминон, Ҳушёр, Малбуд ва Варган ҳудудларида икки ой давомида тик қудуқлар ўрнатилиб, бўш турган ерлар ўзлаштирилади. Тумандаги эски аэродром қайта таъмирланади ва вилоят марказига ҳаво йўллари орқали бориб келишни йўлга қўйилади.