Собиқ Президент ўтирган қамоқхона калити сотувга қўйилди

Жанубий Африканинг собиқ Президенти Нелсон Мандела умрининг 18 йилини ўтказган Роббен оролидаги қамоқхона камерасининг калити Нью-Йоркдаги Гернси аукциони томонидан 2022 йил январь ойида сотувга қўйилади. 

Калитни сотувчи эса Жанубий Африкадаги ўша машҳур қамоқхонанинг собиқ қўриқчиси Кристо Бранд эканлиги айтилмоқда. 

Жанубий Африка ҳукумати калит сотувга қўйиладиган аукционни тўхтатишни талаб қилмоқда. Мамлакат Маданият вазири Натҳи Мтхетвага кўра, ушбу масалада ҳукумат билан ҳеч қандай келишув амалга оширилмаган.

“Калит – бутун Жанубий Африка халқининг миллий бойлигидир. У қандайдир бир инсоннинг шахсий буюми эмас”, дея таъкидлаган вазир. 

Нью-Йоркдаги Гернси аукционининг маълум қилишича, 2022 йил 28 январь куни бўлиб ўтиши режалаштирилган кимошди савдоси Нелсон Мандела номига мемориал боғ барпо этиш ва унинг музейини очиш учун ташкил этилмоқда.

Аукционда қамоқхона калитидан ташқари, Манделага тегишли яна бир нечта ноёб буюмлар ҳам ўрин олган. Сотувга қўйиладиган буюмлар орасида собиқ маҳбуснинг қаламига мансуб Роббен оролидаги маёқ сурати, машқ велосипеди ва қамоқхона теннис ракеткаси ҳам бор.

Демократия тимсоли ва Жанубий Африкада миллий қаҳрамон саналган Мандела умрининг 27 йилини қамоқда ўтказган. Роббен оролидаги қамоқхонада эса у 18 йил ўтирган. Ҳозирда калитга эгалик қилаётган Кристо Бранд оролдаги қамоқхонада қўриқчилик қилган даврида Мандела билан яқин дўст бўлиб қолган.

Мандела 1990 йилда Жанубий Африкада кучли ирқий сегрегациянинг заифлашиши ортидан қамоқдан озод этилган. Халқ меҳрини қозонган собиқ маҳбус 1994 йилда мамлакатнинг биринчи қора танли президенти этиб сайланган.

У мамлакатни фақат бир марта 1999 йилгача бошқарган. Нелсон Мандела 2013 йил 95 ёшда оламдан ўтган. 

Маълумот учун, Манделанинг туғилган куни шарафига, 2009 йил 18 июль кунидан бошлаб АҚШда Халқаро Нелсон Мандела куни нишонлаб келинади. У инсонларнинг дунёни ўзгартириш кучига эга эканлиги ҳақидаги ғоялар, миллатлар эркинлиги ва демократия нишонланадиган кун сифатида тарихга кирган.

Беҳруз Саидов