Сиёсий кескинликлар FIFA тарғиботига зид – Тареми

Эрон миллий терма жамоасининг 2026 йилги Жаҳон чемпионати олдидан ўтказилган илк матбуот анжумани деярли тўлиқ сиёсий мавзуларга бағишланди. Бу ҳақда “Al Jazeera” телеканали хабар берди. 

Эрон терма жамоаси етакчиси ва Грециянинг “Олимпиакос” клуби ҳужумчиси Меҳди Таремининг айтишича, жамоанинг Янги Зеландияга қарши очилиш ўйини ҳақида деярли савол берилмаган. Шунга қарамай, футболчилар мазкур баҳсни интиқлик билан кутаётганини билдирган.

Хабарларга кўра, матбуот анжумани бошланишидан олдин FIFA вакили журналистларга асосан спорт мавзуларида савол беришни тавсия қилган. Бироқ сиёсий мавзулардан қочиб бўлмаслиги ҳам қайд этилган.

Эрон терма жамоаси бош мураббийи Амир Ғаленойи АҚШ томонидан жамоага ўқув-машғулот йиғини ўтказиш учун шароит яратилмагани муайян қийинчиликлар туғдирганини айтган. Унинг фикрича, бундай ҳолатлар футбол руҳига салбий таъсир кўрсатади.

“Натижалар қандай бўлишидан қатъи назар бу вазият ўзимизни ноқулай ҳис қилишимизга сабаб бўлмоқда”, дейди мураббий.

Меҳди Тареми ҳам бош мураббийнинг фикрларини қўллаб-қувватлаган.

“Биз доим футбол тинчлик ва қувонч элчиси эканини айтамиз. Аммо ҳозир бу ҳиссиёт йўқолиб бораётгандек. Менимча, одамларнинг Жаҳон чемпионатини кутишдаги ҳисси бу сафар аввалгидек эмас. Мавжуд кескинлик қувончни соя остида қолдирмоқда. Бу эса FIFA тарғиб қилаётган ғояларга зид”, дейди Тареми.

Ғаленойи эса футбол халқлар ва маданиятларни бирлаштириши кераклигини таъкидлаган.

“Сафар билан боғлиқ муаммоларга қарамай, Жаҳон чемпионати муваффақиятли ўтишига умид қиламан”, дейди у.

Матбуот анжумани якунида Тареми ҳазил аралаш журналистларга ҳеч ким футбол ҳақида савол бермаганини эслатган.

“Биз Янги Зеландияни ҳурмат қиламиз ва яхши ўйин бўлади деган умиддамиз”, дейди ҳужумчи.

Маълумот учун, жорий йилнинг февраль ойи охирида АҚШ ва Исроил Эронга қарши ҳарбий операция бошлаган эди. Март ойида эса Эрон спорт вазири Аҳмад Донямали миллий жамоа Жаҳон чемпионатида иштирок этмаслигини маълум қилган. Бироқ FIFA ва Эрон футбол федерацияси ўртасидаги музокаралардан сўнг, 30 апрель куни FIFA президенти Жанни Инфантино Эрон мундиалда иштирок этишини тасдиқлади.

Шунингдек, Эроннинг Туркиядаги элчихонаси терма жамоа делегациясининг айрим аъзолари, жумладан, мураббийлар штаби вакилларига АҚШ визаси берилмагани ҳақида хабар қилган.

Эрон терма жамоаси Жаҳон чемпионатида Бельгия, Миср ва Янги Зеландия билан бирга “Г” гуруҳидан ўрин олган. Эронликлар турнирдаги биринчи учрашувини Янги Зеландияга қарши ўтказади.

Қизиғи шундаки, жамоа гуруҳ босқичидаги барча учрашувларни АҚШда ўтказса-да, унинг машғулотлар базаси Мексикада жойлашган.