“Сити” Норвегиядаги сафар учун мухлисларга пулини қайтариб беради

“Манчестер Сити” футболчилари Норвегиянинг “Будё-Глимт” жамоасига қарши сафардаги Чемпионлар лигаси ўйини чипталар пулини мухлисларга қайтариб беради. Бу ҳақда BBC’га клуб сардори Бернарду Силва ва унинг ўринбосарлари Рубен Диаш, Родри ҳамда Эрлинг Ҳоланд бутун жамоа номидан маълум қилди.

“Биз мухлисларимиз бизни уйда ва сафарда қўллаб-қувватлаш учун дунё бўйлаб саёҳат қилганларида нимани қурбон қилишларини биламиз ва биз буни ҳеч қачон оддий ҳол деб билмаймиз. Норвегияга саёҳат қилган мухлисларнинг чипта пулларини қайтариш биз қила оладиган энг кам нарса”, дейилади футболчилар баёнотида.

Манбага кўра, “Манчестер Сити” футболчилари 374 мухлисга чипта пулларини қайтариб беради. Ҳар бир чипта нархи 25 фунт стерлингни ташкил қилади, жами пуллар эса тахминан 9 357 фунт стерлингни ташкил этади.

Маълумот учун, “Будё-Глимт” ва “Манчестер Сити” учрашувида мезбонлар 3:1 ҳисобида ғалаба қозонди. Ушбу баҳсда Абдуқодир Ҳусанов тўлиқ 90 дақиқа ҳаракат қилди. 

Ҳозирда “Манчестер Сити” UEFA Чемпионлар Лигаси турнир жадвалида етти ўйиндан сўнг 13 очко билан еттинчи ўринда бормоқда. Жамоанинг мусобақадаги кейинги ўйини жорий йилнинг 28 январь куни Туркиянинг “Галатасарой” жамоасига қарши бўлади.