“Сити” Альваресни қайтариб олиш имкониятини кўриб чиқмоқда

Англиянинг “Манчестер Сити” клуби Испаниянинг “Атлетико Мадрид” жамоасида тўп тепаётган аргентиналик ҳужумчи Хулиан Альваресни ижарага олиш имкониятини кўриб чиқмоқда. Бу ҳақда “Marca” хабар берди.

Аргентиналик футболчи 2024 йил август ойида “Манчестер Сити”дан “Атлетико Мадрид”га кўчиб ўтган. ОАВ маълумотларига кўра, трансфер қиймати 94 миллион еврони ташкил этган.

Лондоннинг “Арсенал” клуби ҳам Альваресга қизиқиш билдирмоқда. Бироқ футболчининг ўзи Англияга қайтишни истамаётгани айтилмоқда.

“Атлетико Мадрид” эса Альварес бўйича музокараларни бошлаш учун камида 150 миллион евро талаб қилмоқда. Шунингдек, Мадрид клуби унинг ўрнига муносиб футболчи қўшилган тақдирда ҳам таклифларни кўриб чиқишга тайёр.

Айни пайтда Альварес касаллиги сабаб бир нечта машғулотни ўтказиб юборган ва шахсий мураббий билан алоҳида шуғулланмоқда.

Аввалроқ, Альварес “Атлетико Мадрид” билан 2030 йилгача тузилган шартномаси борлигига қарамай, Мадрид клубини тарк этиш истагини очиқ билдирган эди. Испания ОАВлари “Барселона” аргентиналик футболчи учун 130 миллион евро таклиф қилишга тайёрлиги ҳақида хабар берган. Кейинчалик “Атлетико Мадрид” Альвареснинг Каталония клубига ўтиш эҳтимоли деярли нолга тенг эканини маълум қилди.

Маълумот учун, 26 ёшли Альвареснинг “Атлетико Мадрид” билан шартномаси 2030 йил июнь ойига қадар амал қилади. У ўтган мавсумда мадридликлар сафида 49 та учрашувда майдонга тушиб, 20 та гол урган.

Шунингдек, Альварес Аргентина миллий терма жамоаси сафида 58 та ўйинда 15 та гол муаллифи бўлган. У терма жамоа билан 2021 ва 2024 йилларда Америка кубоги, 2022 йилда эса Жаҳон чемпионатида ғолиб чиққан.