Сирдарёда ўғрилик билан шуғулланган жиноий гуруҳ қўлга олинди

Сирдарё вилояти Оқолтин туманида кўп марта ўғрилик жиноятини содир этган жиноий гуруҳ қўлга олинди. Бу ҳақда Сирдарё вилояти Ички ишлар бошқармаси хабар берди.

Маълум қилинишича, Оқолтин туманида истиқомат қилувчи фуқаро ўзига таниш бўлган бошқа бир жиноий шериги билан ўзаро тил бириктириб, жорий йилнинг 27 февраль куни туманда жойлашган автоэҳтиёт қисмлари сотуви билан шуғулланувчи дўконга яширин равишда кириб, умумий қиймати 51 млн 160 минг сўмлик товар-моддий бойликларини ўғирлаб кетган ва мазкур буюмлардан арзон-гаров нарх эвазига сотиб юборган.

Шундан сўнг, гуруҳ яна жиноий режа тузишни бошлаган. Жорий йилнинг 13 март куни улар ўзларига тегишли бўлган автомашинада Оқолтин тумани Мустақиллик маҳалласида жойлашган автоэҳтиёт қисмлари дўконига яширин равишда кириб, умумий қиймати 43 млн 90 минг сўмлик товар-моддий бойликларини ўғирлаб, ўзларига таниш бўлган фуқарога яна арзимас пул эвазига сотган.

Терговга қадар текширув ҳаракатлари жараёнида мазкур жиноятни содир этган шахслар қўлга олинган.

Эслатиб ўтамиз, аввалроқ Қашқадарё вилояти Қарши туманида босқинчилик жиноятини содир этган жиноий гуруҳ аъзолари қўлга олинганди.