Синнер тарихда атиги икки теннисчи эришган натижани такрорлади

Бугун, 30 март куни Майами турнири финали бўлиб ўтди. Унда дунёнинг иккинчи ракеткаси, 24 ёшли италиялик теннисчи Янник Синнер Майами очиқ чемпионатида ғалаба қозониб, теннис тарихида атиги икки нафар афсонавий теннисчи эришган ноёб натижани такрорлади.

Финал учрашувида у чехиялик теннисчи Иржи Легечкуни кетма-кет сетларда 6/4, 6/4 ҳисобида мағлуб этди. Шу тариқа Синнер Майами Мастерс турнирида бирорта ҳам сетни бой бермаган ҳолда чемпионликни қўлга киритди. У бу натижа билан 24 карра “Катта дубулға” чемпиони Новак Жокович ҳамда саккиз карра “Катта дубулға” ғолиби Иван Лендл эришган ютуқни такрорлади.

Таъкидлаш жоизки, Синнер мусобақа давомида бир қатор кучли рақибларни ҳам мағлуб этди. У Александр Зверевни, Фрэнсис Тиафони, Алекс Микелсенни, Корантен Мутени ҳамда Дамир Жумхурни енгиб, финалга йўл олганди.

Маълумот учун, мусобақанинг аёллар ўртасидаги баҳслар финалида дунёнинг биринчи рақамли теннисчиси, беларуслик Арина Соболенко Коко Гауффни мағлуб этди.

Финал учрашуви уч сет давом этди. Унда Соболенко рақибасини 6:2, 4:6, 6:3 ҳисобида таслим қилди.