Сиднейдан Нью-Йорккача: дунё 2026 йилни қандай кутиб олди? (фоторепортаж)

Дунёнинг турли мамлакатларида 2026 йил оммавий сайиллар, шоулар ва анъанавий мушакбозликлар билан қарши олинди. Асосий байрам тадбирлари мегаполисларнинг марказий майдонлари ва соҳилбўйи ҳудудларида бўлиб ўтди.

Янги йилни биринчи бўлиб Осиё–Тинч океани минтақаси мамлакатлари қарши олди. Сидней ва Оклендда байрам салютлари бандаргоҳлар ва рамзий меъморий иншоотлар узра отилиб, минглаб томошабинларни жамлади.

Осиёда Янги йил чироқлар шоуси ва концертлар билан нишонланди. Токио ва Сеулда байрам тадбирлари кучайтирилган хавфсизлик чоралари остида ўтказилди, Хитойнинг йирик шаҳарларида эса асосий эътибор лазерли ва мультимедия шоуларига қаратилди.

Дубайда Янги йилни нишонлаш чоғида дунёдаги энг баланд бино – “Бурж Халифа” атрофида мушаклар отилди.

Европа пойтахтларида анъанавий мушакбозликлар бош майдонлар ва тарихий обидалар ёнида бўлиб ўтди. Париж, Берлин ва Лондонда байрам дастурлари мусиқий чиқишлар ва чироқлар шоуларини ўз ичига олиб, ўн минглаб одамларни жамлади.

Нью-Йоркда минглаб одамлар Таймс-сквер майдонига тўпланди.

Кўплаб мамлакатларда 2026 йил тинчлик, барқарорлик ва умид шиорлари остида кутиб олинди, байрам тадбирларига эса давлат раҳбарлари ва шаҳар ҳокимиятларининг табриклари ҳамроҳ бўлди.