Si Szinpin 7 yil deganda Kim Chen Inning huzuriga bordi (video)

Bugun, 8 iyun kuni Xitoy Xalq Raisi Si Szinpin Koreya Xalq Demokratik Respublikasining poytaxti Pxenyanga davlat tashrifi bilan bordi va ikki kunlik rasmiy safari boshlandi. Bu haqda Xitoy Markaziy televideniyesi xabar berdi.

Avvalroq, Xitoy Tashqi ishlar vazirligi tashrif 8–9 iyun kunlari Koreya Xalq Demokratik Respublikasi rahbari Kim Chen In taklifiga binoan amalga oshirilishini bildirgan edi.

Tashrif Pekin va Pxenyan o‘rtasidagi faollashgan aloqalar fonida o‘tmoqda. Xitoy Koreya Xalq Demokratik Respublikasining asosiy iqtisodiy va siyosiy hamkori bo‘lib qolmoqda, ikki davlat munosabatlari odatda Koreya yarim orolidagi barqarorlikning muhim omillaridan biri sifatida qaraladi.

Si Szinpin bilan birga uning rafiqasi Pen Liyuan, Xitoy Kommunistik partiyasi Markaziy qo‘mitasi Siyosiy byurosi Doimiy qo‘mitasi a’zosi Say Si, Xitoy Tashqi ishlar vaziri Van I va boshqa yuqori martabali rasmiylar ham hamrohlik qilmoqda.

Hozircha muzokaralarning aniq mazmuni oshkor etilmagan. Xitoy hukumati avvalroq ikki tomonlama munosabatlar va strategik hamkorlikni rivojlantirish muhimligini ta’kidlagan edi.

Tashrif davomida tomonlar hamkorlik, mintaqaviy xavfsizlik va xalqaro kun tartibi masalalarini muhokama qilishi kutilmoqda.

Si Szinpinning KXDRga ushbu tashrifi so‘nggi yetti yildagi birinchi davlat tashrifi bo‘lib, ikki davlat munosabatlaridagi eng muhim diplomatik voqealardan biri bo‘lishi mumkin.

Avvalgi davlat tashrifi 2019 yilda bo‘lib o‘tgan edi. Shundan keyin ikki davlat rahbarlari aloqalarni davom ettirgan, ammo yuqori darajadagi rasmiy tashriflar amalga oshmagan.