Швейцария элчиси ўзбекистонликларни огоҳлантирди (видео)

Шу кунларда Швейцариянинг Ўзбекистондаги элчихонасига ушбу давлатга сохта ишга таклиф қилиш ва қалбаки ишлаш рухсатномалари билан боғлиқ мурожаатлар кўпайган. Бу ҳақда элчихона ва Миграция агентлиги фуқароларга огоҳлантириш билан чиқди.

“Хонимлар ва жаноблар, биз Швейцариянинг Тошкентдаги элчихонасида фирибгарликлар, жумладан, Швейцарияга ёлғон иш таклифлари ва “у ерда ишлашга”, деб берилаётган сохта ишлаш рухсатномалари ҳақида тез-тез эшитяпмиз. Шундай экан, Ўзбекистонда яшаб, Швейцарияда иш қидираётган бўлсангиз, фирибгарлик қурбони бўлиб қолишдан ўзингизни ҳимоя қилинг”, дейди Швейцариянинг Ўзбекистондаги фавқулодда ва мухтор элчиси Константин Оболенский. 

Шунингдек, элчи иш таклифи келиб тушса, жуда эҳтиёт бўлишни ва унинг чиндан ҳам ҳақиқийлигини текширишни, унинг ҳақиқийлигини текшириш учун Швейцариядаги потенциал иш берувчи билан бевосита алоқада эканингизга ишонч ҳосил қилишни тавсия қилган. 

“Эътибор беринг, фирибгарлар ўзларини компания вакили сифатида кўрсатишади ва компания ёки ҳатто, Швейцария расмийлари номидан сохта ҳужжатлар ясайди. Шунинг учун, Швейцарияда ишга олмоқчи бўлган компания билан тўғридан тўғри мулоқот қилаётганингизни турли манбалардан фойдаланиб текширинг. 

Жуда муҳим: ҳеч қандай шароитда пул тўламанг ёки ўтказманг! Агар иш таклифи ҳақиқий бўлса, ишлаш учун рухсатнома олиш иш берувчининг зиммасида бўлади. Иш визасини олиш учун Швейцариянинг Москвадаги элчихонасида жойлашган Минтақавий консуллик марказига шахсан ариза топширишингиз керак бўлади. Тошкентдаги элчихонага эмас!

Агар сиз ўзингизни бундай жиноят қурбони ёки фирибгарлар билан алоқада бўлдим, деб ҳисобласангиз, бу ҳақда маҳаллий ички ишлар органига хабар беришингизни тавсия қиламиз”, дейди элчи.

Хорижда қонуний ва хавфсиз ишлашни мақсад қилганлар Миграция агентлиги ва унинг ҳудудий филиалларига ёки лицензияга эга Хусусий бандлик агентликларига мурожаат қилиши мумкин.